الجينات.. السر وراء الناس الصباحيين والمسائيين
الساعة 7 الصبح والمنبه مبطلش رن، وأنت سامعه بس مش قادر تقوم من على السرير، مع أنك عارف أن وراك حاجات كتير وكدا هتتأخر. ومهما حاولت تصحى بدري أو تنام بدري مبتقدرش، مع أن واحد صاحبك دايما بيحكيلك ازاي هو بيصحى بدري ويمكن قبل المنبه ما يرن ساعات.
في حد بيحب الصبح جدًا، وحد تاني بيحب الليل. في «شبابيك»، سألنا الشباب أنت شخص صباحي ولا مسائي ودي كانت الإجابات:
«أميرة» قالت إنها «كائن صباحي جدا.. بحب الشمس وبتفائل بيها و بحب الفترة اللي قبل الشروق واستنى الشمس لما تطلع واقعد اشرب نسكافية كدا في البلكونة في عز الضهر والشمس طالعة، ولو صحيت يوم الإجازة متأخر بكتئب جدا وبحس أن اليوم كله ضاع زمان كنت العكس بكره الشمس كدا وبحب الليل وبحب السهر واحس أن النهار ده كئيب جدا».
للاستمتاع بالنوم.. تجنب هذه الأخطاء
لكن «رغدة» مش كده خالص ويمكن على العكس وبتقول «أوقات كتير مبقدرش أصحى الصبح وبكسل جدًا بس لو عندي حاجة اليوم ده متشوقة أنها تحصل هصحى وهبقى فايقة وعايزة أنزل»
و«أحمد» كمان بيقول «أنا بحب أنام متأخر وأصحى على الضهر، مش بعرف أصحى بدري أوي، ومرة سيبت شغل فلوسه كويسة جدًا، بس كان محتاج أني أطبق وأسهر».
«أنا مسائية جدا، في الأيام العادية مبعرفش أنام بليل ابدا بحب السهر ومودي بيظبط بالليل، بس الشغل هو اللي بيخليني اصحى بدري»، وده اللي قالته «شيماء».
طب ليه؟ .. إيه الفرق بين الناس الي بيحبوا يصحوا بدري بسهولة، وبين الناس الي مش بتقدر تصحى بدري؟
في دراسات كتير دلوقتي بتميل إلى أن السبب في الجينات الوراثية، وإن السن كمان ليه تأثير، بس النسبة الأكبر بترجع للعوامل الوراثية.
في إحدى الدراسات الي اتنشرت في دورية «آفاق علم الأعصاب»، استخدموا ذبابة الفاكهة عشان يعملو عليها تجارب خاصة بالجينات تدعم نظرية تسبب الصفات الوراثية في كونك شخص صباحي أو مسائي، ودا لأن الكائنات دي تركيبتها الوراثية شبيهه جدًا بالإنسان، والعلماء بيقولوا أن الجينات المؤثرة في عملية النوم في الإنسان هي نفسها في ذبابة الفاكهة.
شيماء عبدالعال تكتب: من أين يأتي النوم؟
بعد دراسة واسعة حول جينات ذبابة الفاكهة، العلماء وجدوا أن في 80% من الجينات مرتبطة بالنوم، الباحثون في جامعة «ليسيستر» بالمملكة المتحدة، قدروا يحددوا اختلافين في سلوك الذبابة بناءً على توقيت الخروج من طور النوم أو الحضانة. في منهم اللي بيخرجوا الصبح وفي بليل.
ولما تابعوا نسل نوع الذباب إلى كان بيفوق متأخر، كان نسل الذباب دا برضو من نفس نوع الآباء، ودا الي خلاهم يستنتجوا أن الموضوع وراثي. ودا معناه أن العمليات الحيوية داخل الذبابة الي بتخرج من طور النوم بدري مختلف تمامًا عن العمليات في النوع التاني من الذباب.
كتير من الباحثين مهتمين بتأثير الجينات على سلوكيات النوم، لأن دا هيغير حاجات كتير زي نظام العمل المتبع عالميًا، يعني مثلًا الشغل من 9:5 دا ممكن ميكونش مناسب لناس معينين لأن دا في تركيبتهم الوراثية.
