إيه سر انجذابنا للأشخاص «الغلط»؟

عمرك سألت نفسك قبل كده عن سر انجذابك المستمر للأشخاص «الغلط»؟ طبعًا التجربة دي في ناس مبتمرش بيها، بس في غيرهم بيمروا بيها من غير ما يحسوا إنهم بيلفوا في دائرة هتتقفل في النهاية عليهم وهما لوحدهم.

بلاش تحير نفسك كتير وبدل ما كل مرة تقول لنفسك إن دي الشخصية اللي أنت عاوزها وبعد كده تكتشف إنها مش المناسبة ليك، اعرف الأسباب اللي بتخليك تعمل كده مع الخبير النفسي الدكتور أحمد عبدالله واتجنبها.

الجهل بالنفس

قبل ما تبدأ تدور على شخص تحبه ويحبك، لازم الأول تكون عارف نفسك؛ لإن بناءً على النقطة دي هتقدر تحدد شوية مواصفات هي اللي هترسملك الطريق اللي هتمشي عليه بعد كده.

لازم تعرف إن نفسيتك مش هتقبل بأي حد علشان تحبه، ولو في البداية اقتنعت بإنها ممكن تكمل، هتيجي عند لحظة معينة ومش هتعرف تكمل مع الشخص ده لإنه ببساطة مش الشخص اللي هي بتحلم بيه في الأساس، وبالتالي هتكون أنت الخسران الوحيد في الأول والآخر لإن مشاعرك هتتأثر في كل تجربة تدخلها حتى لو كانت مش كاملة.

معني «الإرتباط» و «الجواز»

مينفعش تطلب من واحد مش عارف معنى الإرتباط أو الجواز أنه يختار صح؛ لإن شخصيته في المرحلة دي بتكون عاملة زي المراهقين اللي بيبقى فارق معاهم الإحساس الحلو وبس.

قبل ما تبدأ تفتح قلبك لحد لازم تعرف كويس إن الإرتباط مش مجرد كلمتين حلوين وخروجة، لا ده مسؤولية كبيرة لازم تكون قدها لإنها هتوصلك لمسؤولية أكبر وهي تكوين أسرة، بمعنى تاني مينفعش يعجبك شخص لمجرد إنه جميل شكلًا أو هيقدر يعيشك في مستوى معين، طيب وبعدين؟

لما تكتشف إنه مبيعرفش يتحمل مسؤولية وإنه اختارك لإنك هتشيل الجزء عنه، في الوقت ده هتعرف إن شكله أو فلوسه ودتك للشخص الغلط.

تجاهل الإشارات

النقطة دي ممكن تكون هي أساس المشكلة لإن بمنتهى البساطة، أوقات كتير بتحسي أو بتحس إن الشخص اللي قدامك تصرفاته بتقول إنه مشدود ليك بس في نفس الوقت أنت عارف أنه مش جاد وممكن يكون بيسلي نفسه أو بيشغل وقت فراغه.

وبالرغم من كده بتتجاهل النقطة دي، وبالتالي بتفوق في النهاية على حقيقة بتقول إن كان في إشارات كتير بتقولك إنه كان بيهزر ومش مهتم بس أنت «إنتي» أخدت اللي إحساسك عاوزه واتعاملت بناءً على كده.

الكلام ده مش بس على المرتبطين، لا كمان المخطوبين لإنهم بيشوفو إشارات كتير من البداية تقولهم إن ده الشخص الغلط بس فرحة الخطوبة وإحساس الحب بيعمي عيونهم.

الأفلام الرومانسية

مفيش أجمل من إنك تلاقي حب زي اللي كنت بتشوفه دائمًا في الأفلام السينمائية، بس الواقع مش دائمًا بيدينا اللي عاوزينه؟، والدليل على كده إن أشهر أبطال الأفلام الرومانسية وصفوا مشاهدهم بأنها مبالغة ولا تحدث على أرض الواقع.

علشان كده قبل ما تختار شريك حياتك، اخرج للواقع وبص كويس للشخص ده؛ لإن الخطوة دي هتساعدك في إنك تشوف عيوبه ومميزاته فعلًا ومن غير أي تزيف بدل ما يجي عليك الوقت وتكتشف إنك انجذبت للشخص الغلط.

ما «تريد» وما «تحتاج»

للأسف كتير مننا مبيعرفوش يفرقوا بين اللي عاوزينه واللي محتاجينه وبالتالي بتكون النتيجة إنه معرفش يختار صح من البداية.

بمعنى أنه لو كان اختار فلان علشان يكمل معاه مشوار حياته فده بيكون راجع في الأول والآخر لإن فلان ده مثلًا عيلته فيها شخصيات مرموقة أو إنه في منصب مهم وبالتالي لما بيمشي شوية معاه في المشوار بيكتشف إنه مش ده اللي هو محتاجته فيه.​​​​​​​

اقرأ المزيد:

كيف تصطادين عريسًا؟

 

سوزان حسني

صحفية مهتمة بالكتابة في مجال العلاقات

ميكس ميديا