حكاية «يوم الفاصوليا» في اليابان وخطأ المواقع المصرية
موقع «ويكيبيديا» بيقول إن اليابان بتحتفل النهارده بـ«يوم الفاصوليا»، وكتير من المواقع المصرية مشيت وبتمشي ليها سنين وراء الكلام ده، لكن في الحقيقة ده مش صحيح.
الحقيقة
كل يوم 2، 3، أو 4 فبراير من كل سنة بيحتفل الناس في اليابان بعيد اسمه «سيتسوبون»، وخلال العيد ده بيتم رمي حبوب الفاصوليا كطقس من الطقوس المرتبطة باليوم ده لطرد الأرواح الشريرة، والعادة دي ليها اسمه هنعرفه بعد الصورة الجاية اللي بتوضح خبر في موقع ياباني عن الاحتفال بالعيد منشور في 2 فبراير الماضي.
موقع «بوابتك إلى اليابان» يؤكد أيضا خطأ «ويكيبيديا» والمواقع المصرية
«مامي ماكي» في «الشنتو»
ديه مش تعويذة :D ، «ماميه ماكي» أو رمي حبوب الفاصوليا ديه العادة اللي بيمارسها اليابانيين وهمه بيحتفلوا بعيد «سيتسوبون»، كل سنة في 2، 3 أو 4 فبراير زي ما قولنا، وده بمناسبة نهاية فصل الشتاء وقدوم الربيع والعادة ديه من ضمن عقيدة «الشنتو» اللي مرتبطة بمهرجانات اليابان.
يوم الاحتفال
في اليوم ده بيمسك اليابانيين الفاصوليا ويرموها في المعابد اليابانية في كل حتة في البلد وده اعتقاد منهم بإن الفاصوليا ليها دور في طرد الأرواح الشريرة من الحياة وجلب السعادة في كل حتة في اليابان وفي تشابه بينا وبينهم في الحتة ديه.
يعني إحنا عندنا البخور بنستخدمه مع قراءة بعض أيات من القرأن الكريم بغرض إن الشيطان يخرج من البيت ويرزقنا ربنا بالطمأنينة والسعادة.
وبجانب البخور منقدرش ننسى برده العروسة الورق اللي كانت ماسكها عبلة كامل في مسلسل لن أعيش في جلباب أبي وعمالة تشكها وبعد كدة حرقتها بغرض تبعد أي روح شريرة بتكره بناتها.
الأباء بقى في اليوم ده بيلبسوا لبس عفاريت وبيمثلوا إنهم الروح الشريرة والأطفال بيمسكوا حبات الفاصوليا وبيرموها عليهم وبيقولوا «يا عفاريت إخرجي يا سعادة تعالي» والجملة ديه معناها إنهم بيطردوا الروح الشريرة وبينادوا على السعادة إنها ترجع تدب الروح في كل بيوت اليابان.
إيهو ماكي
ده بقى نوع من السوشي بياكلوا اليابانيين في اليوم ده وبيعتبروه إنه بيجلب الحظ السعيد :)
أوبن بوفيه فاصوليا
كل اللي كان مشارك في اليوم ده بياكل في نهايته فاصوليا بس مش أكلة ودمتم لأ ده كل واحد بياكل حبات فاصوليا بعدد سنين عمره وده إعتقاد تاني من اليابانيين إن ده هيخليه يتمتع بصحة كويسة وقوة طول السنة بفضل عدد الفاصوليا اللي أكله.
أسيبكوا تتفرجوا على جزء من الاحتفالية بقى :)
