تصارح صاحبك ولا تسيبه على عماه

أحيانًا بيكون أحد أصدقاءك عنده مشكلة أو فيه عيب معين.. هتعمل إيه ساعتها؟ هتقوله على عيوبه والمشاكل اللي عنده؟ ولا هتخاف انه يتضايق منك وميتقبلش كلامك ونصيحتك؟

لو صديقك دا مهم بالنسبالك يبقى لازم تواجهه بعيوبه، حتى لو كان في احتمال أنه هيتضايق منك، لكنه بعد كدا هيشكرك على اهتمامك بيه وبحياته.

الأسلوب اللي بتتقال بيه النصيحة أهم من النصيحة نفسها، ممكن حد ينصح حد تاني بأسلوب سيء جدًا رغم أنه خايف عليه، لكن أسلوبه هيخلي الشخص دا ميسمعش النصيحة دي، عشان كدا لازم تكون فاهم شخصية صاحبك وتجهز نفسك قبل ما تتكلم معاه و دي حاجات أساسية لازم تاخد بالك منها:

الوقت والمكان

يعني ميبقاش قدام الناس حتى لو أصدقاءه أو أهله، واسأله الأول إذا كان الوقت مناسب معاه أنه يسمعك ولو كان الوقت غير مناسب أطلب منه أنكو تتكلموا وقت تاني، الوقت الي هو يشوفه مناسب.

المقدمة

ابدأ بأنك تأكد على أن كل البشر فيهم عيوب وعندهم مشاكل بما فيهم أنت، عشان ميحسش أنك بتقارن بينه وبينك أو أنك بتحاول تظهر أحسن منه، عرفه أنه مهم بالنسبالك وعشان كدا أنت بتتكلم معاه وعايزه يحسن من نفسه. م الآخر مقدمة الكلام مهمة جدا خد بالك منها وانت بتصارحه بعيوبه.

بلاش الأمر

أول ما تبدأ كلام معاه متبدأش بتوجيه أوامر ليه، حتى لو على شكل نصايح، لكن قوله النتائج السلبية للعيب دا و إزاي بيأثر عليه وعلى حياته وبيخليه يخسر حاجات كتير ، وهو في أيده أنه يتجنب التأثيرات السلبية دي لو صلح من نفسه.

عشان لما يقدر يشوف النتايج السيئة للعيوب دي يدرك حجم المشكلة ويبقى عنده رغبة للتغيير ويتقبل كلامك.

وضوح وصراحة

لما تيجي تكلمه في صلب الموضوع، خلي كلامك واضح وصريح وقوله عيوبه ووجهة نظرك بشكل لطيف تخليه يتقبل الكلام ويدرك أنك عايز مصلحته فعلًا، وطول ما أنت بتكلمه حافظ على نبرة صوتك هادية و حاول متنفعلش مهما كان الخطأ اللي عمله.

توقع أنه يدافع عن نفسه أو أنه ينكر وجود الصفات دي فيه، وجهز الدلائل والمواقف إلى بتأكد كلامك، لكن متواجهوش بيه كأنك عايز تثبت أنه غلط وخلاص وإنما أنك تثبت أن الصفة دي موجودة فيه بس هو مش واخد باله.

ممكن تحكيله مواقف مشابهه مريت بيها واتصرفت إزاي فيها أو انك كنت غلطان في موقف ما وبعدين عرفت غلطتك وحاولت تصلحها.

اسمع

مش معنى أنك شايف حاجة صاحبك بيعملها غلط أنك متديهوش فرصة يدافع عن نفسه أو يوضحلك الظروف الي بتخليه يعمل كدا، اسمع وجهة نظره وشوف هيقول ايه، لأن ممكن تكون أنت غلطان أو مش فاهم موقفه وظروفه، وممكن يكون هو بيحاول يبرر نفسه بمبررات غير منطقية، لكن لازم تسمعه وتديله مساحته في الكلام وبحط نفسك مكانه عشان تقدر تساعده.

في النهاية، قوله أن هدفك من كلامك معاه مصلحته وأنك متقصدش أي احراج ليه أو أنه يتضايق منك، وفهمه أنكو أصدقاء مهما حصل وأنك متقبله بعيوبه لكنك بتنصحه عشان يكون شخص أفضل.

اخترنا لك :

12919918_1862825727277688_1949521369384267373_n

12919928_1863221317238129_1507863398789840893_n 12936584_1863221320571462_908106172876253991_n

منة مدحت

صحفية ومترجمة مهتمة بالكتابة في ملف العلاقات والثقافة الجنسية

ميكس ميديا