9 خصائص تميز الشخص المبدع.. يا ترى إيه هي؟
المبدع دايمًا بيطلق العنان لخياله عشان يقدر يجيب فكرة يفضل العالم كله يتكلم عن عظمتها وده خلى ليه خصائص تميزه. طب يا ترى إيه هي خصائص المبدع؟
في الموضوع ده نقلنا ليكم خصائص المبدع من موقع Life Hack عشان تتعرفوا عليها:
عقلهم حديدي
عقل المبدع هو كنزه اللي جواه عبقرية ملهاش حدود، والعقل ده رغم إنه بيرهقه في أوقات بس كل ده يهون قصاد تميزه وتفرده بأفكاره.
مكان مريح
المكان خاصية من الخصائص المهمة للمبدع لأنه هيطلع فيه إبداعه وعشان كدة بيحتاج لمكان مناسب يقعد فيه و«يستكنيص»، و«يمخمخ» عشان يعرف يبدع برواقة.
دواير فكرة بتجر فكرة هو ده عقل المبدع اللي بيفضل في دايرة من الأفكار لأنه عامل زي الرادار أي حد يقول حاجة ممكن يعتبرها فكرة بس بييجي عليه فترة في حالة إنهاك وبيرجع تاني بعد فترة قصيرة.
تجديد إبداع مفيش حد بيفضل على وتيرة واحدة لأن هيجي عليه وقت ويزهق نفس الحال للمبدع، وميقدرش يفضل طول الوقت في مكان واحد فلازم يجدد إبداعه في أماكن تانية يستمد منها أفكار حتى لو قعد في المكان ده لفترة طويلة.
عميق
زي ما قولنا المبدع عامل زي الردار بيتابع كل تفاصيل الناس والحياة عشان يطلع أفكار إبداعية وده يعتبر عمق في التفكير بيتصف بيه المبدع.
تركيز بشدة
لما بيركز في شغله مش بيحب أي حد يقطع تفكيره ده ولو قطعت حبل أفكاره وهو بيشتغل بيقعد 20 دقيقة على بال ما يرجع تاني لحالته حتى لو أنت قطعته 20 ثانية بس.
تجميعة خيوط
المبدع بيقضي حياته يوصل الخيوط اللي تدله لفكرته ومش بس كدة رجل الأعمال «ستيف جوبز» بيقول إن الموضوع مش بيقتصر على تجميعة الخيوط دي لأ ده كمان عليه إنه يكون عنده حدس ويعرف الخيوط ديه قبل ما تكون واضحة للناس.
جوزائيين
قولنا إن المبدع بيكون عميق في تفكيره وعمقه ده بيخليه مزاجي عامل كدة زي الجوزاء يوم يضحك ويوم زعلان وده لأن المبدع حساس جدًا وبيعيش حياته ما بين التألق والمعاناة.
طفل شغوف جواه شغف وروح المغامرة وبيشوف الحياة بعيون طفل، وعشان كدة عمر ما روح المبدع هتكبر.
