أنت حاسس بإيه ناحيتها؟.. 5 نصائح لزيادة «الوعي العاطفي»
أوقات كتير بنخاف من فكرة الإرتباط لمجرد إننا شايفين النماذج اللي حوالينا كلها سلبية مفيهاش حد حياته سعيدة، ولما نيجي نسأل عن السبب نلاقي الحب قل بينهم أو إن المشاكل المادية وقفت حياتهم.
ممكن فعلًا تكون دي أسباب بس الحقيقي اللي بيدمر العلاقة هو إننا معندناش وعي عاطفي نقدر من خلاله نعرف إيه اللي إحنا عاوزينه من العلاقة دي من غير ما نتعرض لصدمات كتير ترجعنا لورا ألف خطوة.
ودلوقتي قبل ما نعرف إزاي نزود الوعي، محتاجين نعرف إيه هو تعريف الوعي زي ما وصفه الكاتب الأمريكي دانيال جولمان.
«جولمان» قال إن الوعي العاطفي هو مدى قدرتك على الاعتراف بمشاعرك واحترامها لضمان تعامل سليم مع الغير، وعلشان ده يتحقق أنت محتاج 5 نصائحك هتساعدك في زيادة الوعي.
- اعرف نفسك كويس
في كتابه «الذكاء العاطفي» يقول «جولمان» إن وعي الإنسان لنفسه بيساعده في معرفة شعوره سواءً كان إعجاب، حب، شهوة.. إلخ، بس لو مقدرش يتصاحب عليها هيقع تحت رحمتها.
وبالتالي علشان تتجنب المشكلة دي إنت محتاج تعرف كل كل حاجه عنها، إيه اللي بيخليها تغضب، سبب قربها أو بعدها عن الأشخاص اللي حواليها، كل الحاجات دي هتساعدك في السيطرة عليها كويس، وبدل ما مشاعرك هي اللي تحركك إنت اللي هتحركها في أي إتجاه.
- سيطر على عواطفك
مهم جدًا إنك تعرف إزاي تسيطر على عواطفك، ومتى تهديها، وإزاي تعبر عنها، لو في قلق من شىء معين إزاي تتخلص منه، وتتصرف بحكمة في المواقف.. إلخ.
غير كده، لو فشلت في السيطرة هتلاقي نفسك معرض كل يوم لحالة إعجاب أو حب خصوصًا في مراحل معينة من حياتك بتبقى محتاج فيها شخص يقولك أنا جنبك ومش هسيبك، دي كلها حاجات مهم إنك تعرفها علشان فشلك فيها ممكن يوصلك لمرحلة تكره فيها أي إرتباط.
- افهم سبب رفضك للأشخاص
لما تلاقي نفسك بترفض شخص مستعد يعمل عشانك أي حاجة تسعدك؟ لازم الأول تعرف سبب رفضك، هل هو مشكلة معينة في الشخص ده ولا السبب راجع ليك أنت؟
لإن ببساطة أحيانًا بنرفض شخص علشان هو في شيء إحنا مش بنحبه في نفسنا، وبالتالي النقطة دي هتساعدك في إنك تعرف نفسك كويس ومتظلمش غيرك.
- اتحكم في رغباتك
الخطوة دي معناها إنك تعرف إزاي توجه رغباتك لخدمة هدف معين، زي مثلًا إنك بتحب ترتبط بالبنات لأغراض شهوانية ملهاش أي علاقة بالحب.
هنا لو أنت عرفت تتحكم في النقطة دي بمعنى إنك متخليش عندك وقت فراغ، تبعد عن أصحاب اللي بيساعدوك على ده، هتقدر في النهاية إنك ترتبط على أساس صح.
- اتعرف على عواطف الآخرين
الناس اللي معروف عنهم الميزة دي بيكون إحساسهم بالناس اللي محتاجاهم عالي كتير مقارنة بغيرهم.
ده غير إن الخطوة دي مش بس هتخليك تتصرف معاهم صح، لا دي كمان هتعرفك مشاعرك إنت اللي ممكن تكتشف بيها حاجات غايبة عنك.
المصدر: 1
