ليه البنات بتميل للاكتئاب أكتر من الولاد؟
البنات عندها حالات اكتئاب أكثر من الولاد، وده شيء منطقي، اللي بيقول كده هو دكتور علم النفس من جامعة بنسلفانيا ليونارد ساكس، في مقاله بصحيفة «نيويورك تايمز» الأمريكية.
«ساكس» مستشار عائلي مرخص دوليًا من المجلس الأمريكي لطب الأسرة، وشرح في مقاله الأسباب وراء ميل البنات للاكتئاب أكتر من الولاد، بناءً على الأبحاث الي أجرها في الموضوع ده.
«ساكس» قال إن فيه نموذجين اتكرروا قدامه في العقدين السابقين بطريقة ملفتة للانتباه وهما: بنت نشيطة وبتتحرك وبتشتغل، وولد كسول ومبيشتغلش ومستني كل حاجة تيجي لحد عنده.
إزي تعالج نفسك من الاكتئاب وأنت نايم؟
في إحدى الحالات الي شافها والي اتكررت كتير، كان الأب والأم قلقين على أبنهم اللي مش بيذاكر ومش مهتم بدراسته، وبيقضي معظم الوقت في ألعاب الانترنت أو الكمبيوتر، بينما البنت في نفس العيلة، على العكس من أخوها، نشيطة وبتلعب رياضة ومهتمة بدراستها وبحياتها الاجتماعية.
لكنه لما اتكلم معاها كانت بتقوله إنها عندها مشاكل في النوم، وأنها بتأنب نفسها لو زودت في الأكل، وأنها بتعاقب نفسها أحيانًا بأنها تمسك الموس وتعلم على جسمها في مناطق أهلها ميقدروش يشوفوها، عشان تمنع نفسها أنها تاكل أكل فيه سعرات حرارية كتير ووزنها ميزيدش، لكنها عمرها ما قالت الكلام ده لأبوها أو لأمها.
ليه البنات أميل للاكتئاب؟
«ساكس» بيقول إن أحد العوامل القوية، هي التفكير في المظهر، وإحدى الدراسات بتقول إن البنات بداية من مرحلة المراهقة بيكونوا أقل رضاءً عن أجسامهم، على العكس من الولاد إلى بيبدأوا يشعروا بالرضا عن شكلهم وجسمهم.
تاني عامل مؤثر هو إزاي البنات بتتأثر بالسوشيال ميديا، البنات غالبًا بتحب تنشر صورتها هي، بينما الولد بيحب يحط صورة حاجة هو عملها أو أنجزها، دا غير أن تأثر البنات بإعجاب الآخرين بصورتها دي أكبر بكتير من تأثر الولاد.
«ساكس» بيقول: «تخيل بنت قاعدة في أوضتها لوحدها، بتتفرج على صور صحباتها على إنستجرام، وكل واحدة فيهم بتعمل إيه ولابسة إيه وتفكر أنهم كلهم مبسوطين وهي لا».
أسباب إدمان «فيس بوك» وكيف تتخلص منه؟
الولاد أقل تأثرًا بسلبيات السوشيال ميديا لتلات أسباب :
- الولد دايما بيعتقد إن حياته ممتعة ومشوقة.
- الولد من الطفولة وحتى المراهقة يسهل إرضاءه عن البنت، وفي الغالب البنات بيكونوا مثاليات أكثر من الولاد.
- الولاد بيفضلوا أنهم يلعبوا gamesبدل أنهم يتصوروا سيلفي أو يتفرجوا على صورهم على العكس من البنات، وكمان الألعاب دي بتدي احساس بالانتصار والفوز للولد ودا بيرضيه حتى لو انتصار وهمي.
البنت حتى لو شكلها مقبول أو جميل، ومتوفرلها إمكانيات كتير في حياتها فهي أكثر قلقًا من الولد حول الحياة، وحول رأي الناس في شكلها ومظهرها، وخاصة صديقاتها وأصدقاءها.
تطبيقات ذكية تساعدك على التخلص من الاكتئاب والقلق
ودي حاجات بيقترحها «ساكس» للبنات عشان تقلل من حالات الإحباط والاكتئاب :
- تقليل الوقت اللي بتقضيه على السوشيال ميديا، لأنه من الطبيعي أن البنت تقارن نفسها بصديقاتها عشان كدا كل ما وقت السوشيال ميديا يقل كل ما كان أفضل.
- الإندماج مع الأهل وخاصة الأم والتقرب منها وقضاء وقت أطول معاها، دا لأن علاقة البنت بالأم هتدي البنت ثقة في نفسها ودرجة أعلى من الرضا حول حياتها ومظهرها.
- التقرب من أصدقاء حقيقيين مش افتراضيين، لأن دا هيخلي البنت تعرف تفاصيل حياة أصدقاءها الي بتشوفهم دايما مبسوطين وبيضحكوا وبيعملوا حاجات هي مبتعملهاش، وتعرف أن حياتهم مزيج بين الفرح والحزن والكويس والوحش زيها.
المصدر: 1
