طهقان زهقان متضايق؟.. الحل في حياتك دي من هنا
«طهقان زهقان مضايق مجروح مدبوح مش فايق» دي أغنية قالها ريكو زمان واللي بتوصف حالتك وأنت شايف حياتك متعقدة ومش عارف توصل لسبب تعقيدتها ولا عارف تعمل إيه عشان تفك التعقيدة.
وعشان تعرف ليه وتعمل إيه اقرأ الموضوع ده واللي نقلناهولك من موقع Life hack .
القلق
كل ما بتقلق كل ما بتلاقي إنك مش عارف تحل مشاكلك والقلق ده بيعقد حياتك وبيفقدك الإحساس بالحياة. بس لو فكرت لحظة إنك توفر طاقتك اللي بتروح كلها في التوتر والقلق في إنك تستغلها وتلاقي حلول للمشاكل اللي بتواجهك هتلاقي القلق راح واحدة واحدة.
انتظار
«مفيش شغل كويس في البلد أنا هستنى لحد ما ألاقي شغل أحسن»، كلمة «هستنى» اللي بالمعنى الدارج لبانة في لسانك كل شوية تقولها بتفقدك استغلال الفرصة اللي قدامك اللي تقدر تسعى فيها بموهبتك اللي محفورة جواك.
بلاش تستنى حاجة مش مضمونة ممكن تيجي وممكن لأ واستغل الفرصة الحالية واللي كدة كدة لو دورت جواك هتلاقي عندك الإمكانيات الناجحة اللي تخليك تحققها.
السماح
مش بتسامح أي حد أذاك وضايقك وبتشيل في قلبك كتير وده طبعًا بيضر بصحتك النفسية والعقلية لأنك مش بتحرر مشاعرك وكاتمها جوا قلبك فحاول إنك تحرر مشاعرك وتسامح وتغفر للناس متعقدش نفسيتك وتشيلها فوق طاقتها.
خطوة قدام وخطوتين لورا
أي خطوة بتقدم عليها بتلاقيك على طول رجعت للخلف دور وبتكون متردد إنك تكملها لأنك بتقلق وبتخاف من مخاطرها وده صوت الفشل جواك اللي عايزك دايمًا ورا وعمرك ما تتقدم لقدام وعشان كدة لازم تكتمه ومتستسلمش ليه أبدًا.
أكتر من المفروض تعمله
أي حد بيكون عايز منك حاجة بتوافق على طول إنك تعملها ليه وبتعمل أكتر من المفروض إنك تعمله يومك كله مقضيه في شغلك وفي إنك تخدم الناس.
وتشوف ابتسامة رضاهم بس مع كل ده مفيش وقت ليك إنك تدي مساحة لنفسك وتفرحها. وعشان كدة اعمل اللي مفروض إنك تعمله للحد اللي طلب مساعدتك وسيب الوقت الباقي لنفسك عيش الحياة.
عايش على الماضي
يا رتني كنت دخلت الكلية دي زمان يا رتني معملتش الموضوع ده. مقضي حياتك في إنك تفكر في كل حاجة عدت عليك وإنك كان نفسك تغيرها وفجأة لقيت نفسك عايش في دايرة الماضي وبتبكي على الأطلال.
مع إن الماضي ده مفروض تتعلم منه وتكمل حياتك لأنك لو فضلت قاعد تندب حظك زي مابيقولوا هتعيش في قوقعة حزينة. فأحسن حل إنك تعيش الواقع وتحاول متكررش غلطة غلطها قبل كدة في ماضيك.
