عايز تاكل في مطعم بدوي.. روح «كردان»
عاوز تخرج تتفسح، زهقت من الملل والروتين اليومى، وتكرار الأماكن ونفسك تتبسط مع مراتك أو خطيبتك، أوحتى عندك مناسبة ونفسك تحتفل بيها برة مع عيلتك.
هكلمكم النهارده عن كافيه ومطعم «Kerdan» وهو فروعه فى القاهرة موجود في أماكن كتير.. قررت اروح فرع المعادى الجديدة.. المطعم بيتميز بالطابع الشرقي فى كل حاجه من أول القعدات والترابيزات لحد الأطباق.
جوه «كردان»
الديكور بسيط جدا واخد شكل بدوى شويه، بيعبر عن التراث القديم حتى المكان بتفوح منه البخور الشرقى الجميل.
أول ما بتدخل مدير الكافية بيقابلك بابتسامة وبيسألك «تحب تقعد فين؟» لأن المكان متقسم لمنطقتين مكان في الداخل ومكان بره على الشارع أنا فضلت أقعد جوه الكافيه عشان التكيف.
«ويك إند»
«كردان» بيخصص كل «ويك إند» لمطرب أو فنان صاعد بيبسط الناس ويقدم ليهم الأغاني اللي يحبوا يسمعوها.
ولو حد بيحتفل بعيد ميلاده بيشاركوه الاحتفال، وكمان بيحضروا مفاجأة لصاحب العيد ميلاد. يعنى بيعملوا أغنيه باسمه مسجلة وبيشغلوها وقت بداية الاحتفال، وبيعملوا جو حلو جدا فى الحفلة من أول مدير المطعم لحد الولد بتاع الشيشة، كلهم البسمة مرسومة على وشهم .
«المنيو»
حلو جدا ومرتب لكنه كبير أوي عندهم كل حاجة ممكن تيجى فى بالك الاسعار حلوة جدا ومفيش «مينيم تشارج» يعنى اللى هتطلبه هتتحاسب عليه، لكن بيتضاف فقط 10% خدمة، دى بتكون مكتوبة فى المنيو من تحت.
برجر وبطاطس
ولإني من عشاق البرجر، طلبت برجر جبنو مع باكت بطاطس .. البرجر كان طعمه حلو وخفيف على المعده، مفيش دهون محشو بالخضروات وكلها طازة وريحتها حلوة، بس نوع الجبنة اللى كان فى البورجر ريحته أتغيرت شوية من قطع الزيتون اللى جوة الساندوتش، بس كان شغال.
أما باكت البطاطس كان كبير أوى والبطاطس كانت سخنة وطازة وسعر الاتنين كان حلو جدا لا يتعدى 30 جنيه.
عصير مانجة
العصير فريش طازج، مفيش أى افتكاسات فيه وتقيل جدا تحس أنك بتاكل قطع مانجو مش بتشرب عصير، الكوباية كبيرة جدا اتحداك تقدر تخلصها على طول.
لو جابب تغير مودك وتتبسط مع عيلتك شوية روح «كردان» هتحس بفرق كبير أوى.
