لو عايز وخايف.. دليلك للخروج بحبك من الـ«friend zone»
لما بنلاقي نفسنا داخلين في علاقة حب مبنعرفش نسأل نفسنا عن الشخص اللي بنحبه لإن ببساطة الحب مبيعرفش أسئلة، وخصوصًا لو كان الحد ده هو صديقك أو صديقتك.
متستغربش كتير لإن أغلب علاقات الحب بتكون في بداياتها صداقة، بس يا ترى إيه الحل هنا لو في طرف بيحب والتاني حاسك صديق بس؟ المفروض تعمل إيه؟
اعرف حقيقة مشاعرها
قبل ما تلاقي نفسك متورط في حب هيتعبك أكتر ما هيفيدك، حاول تعرف حقيقة مشاعرها وإن كان ده مش معناه إنك بس تعرف أنت إيه بالنسبة ليها، لأ لازم كمان متنساش إنك تتأكد من ارتباطها ولا لأ.
صحيح إن ده صعب تخبيه خصوصًا لو انتو أصحاب فعلًا، بس أحيانًا بيحصل لو هي مش متأكدة من مشاعر الشخص ده، علشان كده مهم إنك تعرف النقطتين دول قبل ما مشاعرك تتطور.
يقول إيهاب (اسم مستعار): «لما مريت بموقف مشابه وحبيت صديقتي، لقيتها بتصد تصرفاتي وحسيت في الوقت ده بإحراج علشان كده مهم جدًا إنك قبل ما تعمل كده تتأكد من مشاعرها».
اقرأ ايضًا⇐«الحب مينفعش معاه هحاول اغيره».. هكذا تكون العلاقة السوية
شاركها اهتماماتها
لو إنتو الاتنين مبيجمعكوش اهتمامات كتير، حاول تركز بس على اللي بتجمعك معاها؛ لإن ده هيحسسها إنك مهتم إنك تبقى معاها دائمًا وبتحاول تخلق ده بأي طريقة.
وحتى لو ماخدتش بالها، لازم هيجي يوم وتسأل نفسها عن سر اهتمامك ليها، في الوقت ده إما لو هي فعلًا مفيش حد في حياتها هتبدأ تفكر فيك بمميزاتك وعيوبك، وإما ترفض الفكرة تمامًا لو بتعتبرك من الأول صديق.
أما عمرو (اسم مستعار) فيرى: «قبل ما تفكر إزاي تعبر عن حبك ده بشكل صريح، لازم تعبر عنه بمشاركتك لاهتماماتها اللي هتحسسها إنها مش أي حد في حياتك»
اهتم بكل كلمة تقولهالك
و هيجي عليك الوقت اللي ممكن تنسى فيه كلام هي بتقوله، يبقى متحاولش من الأول إنك تبين اهتمام لإن ببساطة إزاي عاوزها تبدأ تفكر فيك او تحول من خانة الصداقة إلى خانة أعمق وأكبر وأنت مش مهتم باللي بتقوله.
بلاش تقول لنفسك هنا إن النقطة دي مملة وإن طبيعي الإنسان بينسى، دي حقيقة فعلًا بس لو أنت اتماديت في النسيان ده هيحسسها إنك مش مهتم باللي بتقوله.
يقول حسام (اسم مستعار): «طالما نفسك المشاعر بينكوا تبقى حب مش صداقة، حاول تهتم بكل حاجة بتقولها حتى لو كانت تافهة بالنسبة ليك؛ لإن التافهة عندك بتكون مهمة عندها».
إظهار الغيرة عليها
دائمًا الغيرة بين الأصدقاء ليها حدود واضحة، ومهما وصلت لأعلى المراحل فهي مبتتعداش السقف المعروف بين الأصدقاء، وده على العكس من غيرة الحب اللي ملهاش أي سقف.
علشان كده حاول وأنت بتحسسها بالغيرة متكونش أوفر في تصرفاتك بحيث إنها متحسش بخنقة منك، وفي نفس الوقت تحس إنك في اهتمام زيادة بيحصل معاها أكتر من أي حد تاني.
أما حسن (اسم مستعار) فكان رأيه إن: «الغيرة من الحاجات المهمة اللي لو حسستها للبنت ممكن يجيب معاها نتيجة فعالة؛ لإن ده هيحسسها إنك متهم بيها هي أكتر من أي حد تاني».
خلق مساحات مشتركة
لازم تعرف إن الصداقة اللي بينكم دي مش مجرد شىء عابر، وإنما خطوة مهمة لازم تحاول إنك تستفيد منها بكل الطرق، لإن ببساطة المساحات المشتركة في التعامل دي هتخليك تعرف تبقى موجود معاها بشكل أكبر، وبالتالي ده هيقوي علاقاتكوا ببعض.
يرى محمد (اسم مستعار): «مهم جدًا إنك تستغل وجود مساحات مشتركة بينكم علشان تعرف تبقى موجود معاهم أطول فترة ممكنة، ده غير إن المساحات دي هتخليك تعرف عنها كل كبيرة وصغيرة وبالتالي هتعرف إزاي تعمل اللي يسعدها ويقربها منك».
اقرأ أيضًا⇐الحب من النظرة الأولى.. حقيقة ولا خدعة؟
مشاركتها المواقف الصعبة
بما إن الإرتباط عند البنات يعني الأمان، فلازم تاخد بالك كويس إن وقوفك جنبها في المواقف الصعبة عمومًا هيخليها تتعلق بوجودك في حياتها وده مش لمجرد استغلال منها.
وإنما علشان أنت في الوقت ده هتزيد في نظرها وهتحس إن علاقتكوا حتى لو صداقة فهي أقوى من علاقتها بأي حد تاني.
وزي ما أحمد (اسم مستعار) بيقول: «قبل فترة ارتباطي كان في بنت معجب بيها بس مكنتش متأكد من حقيقة مشاعرها ناحيتي، وعلشان كده قررت إني اسكت ومصرحش بكلمة واحدة، ولإنها كانت واخدة بالها من اهتمامي بيها ووقوفي جنبها حاولت تعرف حقيقة مشاعري بس في كل مرة كنت ببعدها عن الحقيقة لحد ما جه عليها الوقت اللي وضحتلي فيه إنها بتحبني».
انتظار الإشارة القوية
مش معنى إننا بنتكلم عن محاولات مبدئية منك لمعرفة حقيقة مشاعرها، إنك تغمي عينيك وتشوف اللي أنت عاوزه بس.
وزي ما بتحاول إنك توصلها الاهتمام، استنى رد فعلها لإن بناءً عليه هتعرف أنت هتكمل في السكة دي ولا الأفضل إنك ترجع بدل ما حتى تخسرها كصديقة زي ما أغلب الناس بتفضل.
بحسب محمود (اسم مستعار)، قال: «لما حسيت بمشاعر ناحية زميلتي، وصلتلها ده بكل الطرق بس في نفس الوقت استنيت إشارة قوية علشان اتحرك أنا كمان وده بالرغم من محاولاتها لمعرفة حقيقة مشاعري».
⇓نرشح لك⇓
