نصائح لكل بنوتة كبرت وبقت آنسة

افتكر المرة الأولى اللي سمعت حد بيقولي كلمة آنسة كان عندي 14 سنة وقتها.. حسيت أن في حاجة اتغيرت وأني داخلة مرحلة جديدة ومختلفة.. يعني بقيت كبيرة!.. بس في الحقيقة المرحلة دي على قد ما فيها لحظات حلوة كتير بتحسي قد إيه أنك شخص كبير ومسؤول.. إلا أنه فيها تغيرات كتير في جسمنا وإحساسنا وطريقة تفكيرنا.. خلونا بقى نشوف إيه هى التغيرات..

متتكسفيش

- قبل مانبدأ الكلام على التغييرات اللي بنحس بيها في مرحلة المراهقة.. في حاجة مهمة جدا لازم تخلي بالك منها.. وهي إنك متتكسفيش عشان لازم تتكلمي تقولي على كل حاجة بتمري بيها.. اتكلمي مع مامتك أو مع مُعلمة بتحبيها.. أو أي حد بتثقي فيه وعارفة أنه هيفيدك.. لأن العزلة في المرحلة دي ممكن تؤدي لاكتئاب فخليكي ديما وسط اللي بيحبوكي.

حبي جسمك

النقطة دي مهمة جدا جدا، لأن في مرحلة المراهقة جسمك اللي اتعودتي عليه بيختلف 360 درجة، فمثلا من ضمن التغيرات دي:

الدورة الشهرية: 

علامة انك بقيتي بالغة وجسمك بدأ ينتج البويضات المسؤلة عن تكوين الجنين لما تبقي أم بعد كده إن شاء الله.. لكن قبل مرحلة الجواز البويضة دي بيحصلها انفجار كل شهر وبينتج عنه ده نزول دم.. ودي حاجة كل البنات بتمر بيها عشان كده اسألي مامتك أو أي حد بتثقي فيه.. واتكلموا عن الموضوع و أعرفي إيه اللي لازم تأكليه وتشربيه في الوقت ده.. دي وإزاي برضو تعتني بجسمك.

ظهور شعر في الجسم: 

كمان هيبدأ يظهر لك شعر في مناطق مختلفة في جسمك مكنتيش بتشوفيها قبل كده.. بس طبعا بكثافة أقل كتير من الأولاد.. لكن ده ميمنعش إنك تهتمي بنظافتك وإزالة الشعر بالوسائل المتعددة.

حب الشباب: 

من المشاكل اللي ممكن تسببلك قلة ثقة في نفسك.. لكن مفيش مشكلة من غير حل في كتير من الوصفات الطبيعية ممكن تساعدك على التخلص منها.. لو الحبوب منتشره بشكل كبير ممكن تزوري دكتور للأمراض الجلدية.. بس أهم حاجة الاهتمام بالنظافة الشخصية.. ولبس ملابس داخلية مصنوعة من القطن.. وتغييرها يوميا خصوصا في الصيف لمنع البكتريا اللي بتكون الحبوب في منطقة الظهر.. وخصصي "فوطة" محدش يستخدمها غيريك.

الحب مش عيب ..لكن

الحب أعظم شعور إنساني في الوجود.. وكتير من البنات بيحسوا بالحب ناحية زمايلهم أو حتى مدرسيهم.. بس ده منقدرش نقول عليه حب ناضج فهو مش أكتر من مشاعر جميلة بتحصل بسبب تطور خلايا معينة في المخ خلال فترة المراهقة.. وده اللي بيخليهم يدوروا على الحب في نجوم السينما او الكورة وغيرهم.. وتنتهي المشاعر دي بعد المراهقة وبتفضل مجرد ذكريات جميلة في خيالنا.

أنتِ أغلى حاجة عند عيلتك

أكيد كلنا بنحب أسرتنا لكن أحيانا في مرحلة المراهقة هتلاقي اختلاف شويةبين طريقة تفكيرك وطريقتهم.. ده ممكن يعمل مشاكل بينكم.. كل بنت في السن ده بتكتسب رؤية جديدة عن العالم لتكوين شخصيتها.. أحيانا بنكون بنعند ومنقبلش أي كلمة من حد كبير.. وفي بنات بيتحول العند عندها لسلوك عدواني.. عشان تتفادي كل ده حاولي تتعلمي إزاي تناقشي وتقنعي اللي قدامك بوجهة نظرك.. وتسمعي كتير من الأكبر منك هما عندهم خبرة في الحياة ممكن تفيدك.. حاولي كمان تقرأي كتير وتثقفي نفسك لبناء وعيك وشخصيتك .