بلاش «أفورة» في خطوبة صاحبتك.. 5 ممنوعات عليكي

البنت لما بتعرف إن أعز صحباتها هتتخطب مبتحسش بنفسها، وبتبقى الفرحة بتاعتها هي، لدرجة إنها بتبدأ تخطط لكل حاجة سواءً كان ليها علاقة بالفستان أو الميك آب أو حتى الديكور، من غير ما تعرف اللي صاحبتها عاوزاه.

وأكيد طبعًا مفيش أجمل من تفكيرك في صاحبتك ورغبتك إنك تخليها ملكة في اليوم ده، بس لازم كمان متخليش زحمة الفرحة تنسيكي إن المناسبة دي بتاعتها هي يعني لازم رأيها يبقى هو الأساس وكلامك أنتي اختياري.

وعلشان تتجنبي أي حاجة ممكن تضايقها في اليوم ده، هنعرفك النهاردة مجموعة من النصائح اللي لازم تلتزمي بيها علشان فرحتها تكمل.

المقارنة بينك وبينها

في حال إنك مخطوبة قبلها بلاش تقوليلها «ليه متعمليش كذا، أنا عملته وكان كويس أو في خطوبتي عملت كذا»، ببساطة لأنها مش محتاجة تسمع أي مقارنات، هي محتاجة تفرح بنفسها وبس من غير أي كلام منك.

وسواءً كانت المقارنات دي ليها علاقة بيكي أو حتى بحد تعرفيه، اوعي تعمليها وخليها هي اللي تخطط لخطوبتها ولو احتاجت منك رأي قوليله وخلي كلامك دايمًا اختياري معاها.

تقول «سلمى.الحسيني»: «أصحابي القريبين هما 2 بس، لما اتخطبت واحدة منهم كنا معاها وعملنا اللي هي عاوزاه وكان رأينا مجرد استشاري بس لما اتخطبت صاحبتنا التانية لقينا الأولى عاوزه تعمل زي اللي عملته في خطوبتها، لدرجة إنها لما عرفت ثمن الفستان قالتلها ليه ما أنا كان فستاني بكذا بتاعك غالي، ليه كل المصاريف دي ده أنا عملت كذا بس لأننا كنا أصحاب الموقف عدى رغم إن العروسة كانت مضايقة».

الفستان يكون مختلف

مينفعش يبقى فستانك نفس لون فستانها وإلا الموجودين هيتلخبطوا بينكم، ده غير إن اليوم ده بتاعها هي يعني لازم هي اللي تكون مميزة في كل شىء.

بلاش تنسي الإستايل؛ لإنك لو اهتميتي بس باللون وجبتيه مختلف بس نفس الشكل برضه هيلفت نظر الموجودين وأكيد دي حاجة هتأثر على فرحتها.

أما «آية طارق»: «الموقف اللي حصلي مكنش خطوبة كان أسوأ فرح، لقيت أصحابي داخلين عليا ولابسين فساتين بيضاء، طبعًا الفرح كله بقى مضايق من الموقف لأنهم لخبطوا الموجودين بالرغم إن فستان العروسة ليه إستايل تاني بس في النهاية كلهم أبيض».

بلاش الأخبار السيئة

مش هيحصل مشكلة لو أجلتي خبر مش كويس عنها؛ لإن أكيد المناسبة مش هتتلغي بسبب خبر، بس هي فرحتها هتتأثر ومش هتكون سعيدة.

طبعًا في حالات بتضطرنا إننا نقول الحقيقة، بس في العموم بلاش تعملي حاجة زي كده خصوصًا لو معرفتها مش هتأجل الخطوبة.

«أميرة طه» تقول: «للأسف لما صاحبتي حجزت القاعة حددتها قبل ما تعرف لو أختها اللي مسافرة بعد فترة هيناسبها اليوم ده ولا لأ، وبالفعل اليوم ده كان عامل مشاكل بينهم لأن شغلها كان صعب شوية، صحبتي فضلت طول اليوم بتسأل هي جايه ولا لأ، فاضطريت إني اقولها أنها في الطريق واشغلها بأي حجج لدرجة إني قولتلها أنها جت وبتسلم على الناس، بس في قرب نهاية اليوم قولتلها لإنها كانت بتلح».

التوتر ممنوع

بما إن الضغط كله بيكون عليها سواء في خطوبة أو فرح، يبقى مينفعش كصديقة ليها تكوني متوترة، أنتي المفروض اللي تشيلي أي توتر عنها وتحاولي تهديها.

مهما حصل مشاكل معاكي، حاولي تخليها متحسش بحاجة أو على الأقل اتعاملي مع الأمور بشكل اهدى من كده علشان اليوم يكون كويس وأعصابها متتعبش.

«شيماء أحمد»: «من أول ما بدأنا نجهز للخطوبة وللأسف كان في ضغط جامد، لدرجة إني أنا نفسي كنت متوترة ونفس اليوم يطلع كويس، بس للأسف حصل معايا موقف في الكوافير وحش خلاني اتنرفز وازعق وكانت العروسة هي اللي بتهديني، فطبعًا ده وترها أكتر وخلاها مضايقة بسبب اللي حصل معايا».

وفي النهاية هقولك بلاش تحبطيها​​​​​​​ وعودي نفسك لما تحصل حاجة في الترتيبات سواءً كان ليها علاقة (بفستانها أو الديكور.. إلخ) إنتي شايفاها غلط وكان المفروض متحصلش، إنك متتكلميش غير لو عندك حلول ولو مش عندك، حاولي تهديها وتدعميها وبلاش تكوني سلبية ومحبطة.