من غير وجع قلب.. إزاي تتخلص من حب قديم في حياتك؟

فيه ناس كتير وراها قصة، حب قديم مكملش. بس لا بينفع تنساه ولا ينفع ترجعله. الموضوع ده عامل قلق للناس دي. وفي الموضوع ده هتعرف ازاي تتخلص من حب قديم في حياتك من غير وجع قلب.

«شبابيك» سأل بنات وولاد عن وصفة لنسيان حب قديم، وبيقدملك الوصفات دي يمكن تلاقي فيها حل نهائي يساعدك في التخلص من قصة قديمة تؤرق حياتك حتى الآن.

الكراكيب القديمة

تقول هاجر عزت: «علشان تقدر تنسى قصة كانت في حياتك، لازم أول حاجة تعملها إنك تتخلص من كراكيبك القديمة سواء كانت رسائل، أو هدايا، أو حتى أماكن متعودين تروحوها سوا؛ لإن ببساطة كل الحاجات هتفكرك أكتر ومش هتنسي طول مهي قدامك».

وتؤكد «كمان لازم تبعد فترة عن وسائل التواصل وأي حاجة حتى لو كانت أصدقاء مشتركين بينكم، كل ده هيساعدك إنك تبص شوية لقدام ومتفكرش في اللي راح بس ده لو عندك إرادة».

نضارة المساوئ

محمد عبدالعليم بيقول إن: «طول فترة الإرتباط، محدش من الطرفين بيشوف مساويء التاني وحتى لو شافها بيعمل نفسه مش شايف أي حاجة، علشان كده بعد الإنفصال لازم تفكر نفسك دائمًا بالمساويء اللي كنت بتتغاضى عنها».

ويضيف «اتكلم مع نفسك كتير وأسألها لو هي فعلًا كانت هتقبل تعيش مع الشخصية دي وهي بالشكل ده ولا لأ؟ لو الإجابة كانت لا، يبقى قرار الانفصال كان صح حتى لو مكنش من ناحيتك، المهم إنك تنسى وتبدأ تعيش حياتك».

صداقات جديدة

أما ترنيم محمد تقول إن: «طبعًا في ناس بتعمل محاولات كتير علشان تنسى شخصيات كانت في حياتها وبتفشل، بس يمكن لو عرفنا نغير حياتنا القديمة بكل ما فيها حتى الأصدقاء، الوضع هيختلف معانا كتير».

وتشرح بأن «الصداقة الجديدة هتفتحك على عالم جديدة وشخصيات متعرفش عنها حاجة، أكيد هيكون ليهم  تصرفات تجذبك، تبسطك، تدايقك حتى، بس ده كله في النهاية هيخليك تنسى القديم وتنشغل بحياتك الجديدة».

التركيز على المستقبل

يقول أسامة فهيم: «بما إن الإرتباط بيخلي الشخص أحيانًا يبدي الطرف التاني على حاجات ليها علاقة بمستقبله، يبقى لازم بعد الانفصال متخليش أي حاجة توقفك، خلي تركيزك دائمًا على مستقبلك سواء كان شغل أو دراسة».

ويؤكد «في الحالتين إنت الكسبان لإن وقتك دائمًا هيكون مشغول وممكن حتى متعرفش تقابل أصحابك بس على الأقل هيجي عليك الوقت اللي تلاقي فيه نفسك مش فاكره أي حاجة غير مستقبل بتكمل طريقه، ده غير إن نحاجك إثبات للطرف التاني إنك لسه متكسرتش».

سبب الانفصال

​​​​​​​وترى ندى أشرف أن: «من أكتر الأسباب اللي ممكن تخليك متنساش حب قديم، هو إن طرف من الاتنين ميقولش الحقيقة أو يقرر الانفصال بدون أي سبب، في الوقت ده يا إما هيفضل يسأل عن السبب أو يحاول يعرف وميوصلش لنتيجة».

وتقول «وده على العكس تمامًا من معرفة السبب اللي حتى لو كان نتيجة لقلة الحب أو أي سبب كان، لإنه في الوقت ده هيكون الشخص ارتاح حتى لو تعب واتدمر في ناحية تانية، المهم ميبقاش في أسئلة موجودة واحنا مش لاقيين إجابة عنها».