للحامل.. متحرميش نفسك من كحك العيد

لو عايزة تاكلي بسكويت وكحك وغريّبة براحتك في العيد بس قلقانة أحسن ده يأثر على حملك، متقلقيش.

في الموضوع ده هنقولك على روشتة بيقدمها ليكي دكتور النسا والتوليد ومدير العمليات بالمركز الطبي بمستشفى السكة الحديد عمرو عبدالكريم.

الأكل بالمعقول

الدكتور بيقولك إن أكلك كله في العيد لازم يكون بالمعقول ومهم قوي يكون فيه فاكهة وخضار وسلطة جنب الكحك والبسكويت والغريبة ووجود الفاكهة والخضار والسلطة مع حلويات العيد بيعمل حالة من التوازن في الأكل وبيديكي إحساس بالشبع، والألياف اللي فيها بتخلي الجهاز الهضمي حالته كويسة ومش هيكون فيه عسر هضم ولا تلبك معوي.

التوازان وتقليل الدهون

التوازن اللي إتكلمنا عنه فوق بيقلل الدهون والكوليسترول اللي موجود في حلويات العيد لأن كتر أكل الحلويات وخصوصًا الغريّبة بتعلي الكوليسترول والضغط وبتعمل زيادة في الوزن على المدى البعيد واللي عندها ضغط عالي أو حصلها ضغط حمل قبل كدة أو وزنها زايد بيكون عندها استعداد إن  الكوليسترول والضغط بتاعها يعلى ووزنها يزيد أكتر ماهو زايد وده طبعًا هيأثر عليها وعلى تغذية الجنين.

الحركة بعد الأكل

لازم بعد الأكل تتحركي أو تنزلي تتمشي عشان تحرقي الدهون الزيادة اللي أخدتيها من أكلك للحلويات. وطبعًا العيد هيكون فرصة إنك تعملي كدة لأنك هتخرجي وتتفسحي وتزوري عيلتك وأصحابك.