كرهتي طفلك؟.. متقلقيش ده «اكتئاب ما بعد الولاده» وليه علاج

لو دخلتي في مود كئيب بعد الولادة ومش طايقة تسمعي كلمة من حد يبقى عندك اكتئاب ما بعد الولادة وفي الموضوع ده هنقولك على الحل.

بالنصايح دي اللي جبناها ليكي من استشاري الطب النفسي الدكتور جمال فرويز هترجعي تعيشي حياتك مرة تانية واللي بقى فيها أحلى طفل في الكون :)

سبب الاكتئاب

دكتور «فرويز» بيقول إن الإكتئاب بيحصلك نتيجة لتغيرات هرمونية في الإستروجين والبروجسترون واللي بتأثر على نقص السيروتونين الموصل العصبي المسئول عن الإكتئاب في المخ.

قد يعجبك: تعرفي على محتويات «شنطة الولادة» لكي ولمولود

مراحل الاكتئاب

بيكمل دكتور «فرويز» كلامه وبيقول إن الإكتئاب ليه 3 مراحل هي: البسيطة ودي بتكون عبارة عن شوية قلق، والمتوسطة ودي بتبقى اكتئاب شديد، والصعبة ودي المرحلة اللي بتتوصل لمرض عقلي.

والدكتور بيقول إنه مع بداية شعورك بالاكتئاب لازم تروحي لدكتور نفسي عشان يديكي علاج من البداية عشان متوصليش للمرحلة المتوسطة والصعبة لأن المرحلتين دول بيجي منهم ناس كتير عنده في العيادة واصلين لدرجة إنهم كارهين البيبي. وكل لما لحقتي نفسك من الأول كل ما اتحسنتي وبقيتي كويسة.

استمرار العلاج

ولو حسيتي نفسك كويسة، اوعي توقفي العلاج لأن دي مشكلة كبيرة بيقع فيها ناس كتير وبيرجعوا ينتكسوا مرة تانية وعليكي إنك تسمعي كلام الدكتور اللي هيقولك مدة العلاج قد أيه. وأقصى حاجة للعلاج بتكون من 3 لـ4 شهور والدكتور بيبدأ يسحب منك الدوا بالتدريج لما يحس إنك بقيتي كويسة.

قد يهمك أيضًا: طفلك بيحب الشيل.. كيف تتخلصين من هذه المشكلة؟