لو عايز تاكل أسيوي.. روح «Asian corner»

كتبت - هناء عادل:

كل واحد فينا عنده فضول أنه يعرف أيه الفرق بين أكل البلاد التانية، والأكل المصرى، عشان كده انا روحت هناك. لو عاوز تاكل أكل مختلف، محتار تخرج مراتك فين مليت وزهقت من تكرار الاماكن خدها "Asian corner" المطعم الشهير فى مصر للأكل الاسيوى. "Asian corner" فروعه منتشرة فى كل مكان فى القاهرة أخترت المطعم ده وروحت فرع "سي ستارز" عشان حسيت أنى عاوزه اجرب الاكل الاسيوى من كتر ماسمعت عنه واكيد كمان تغيير عن الأكل المعتاد . المطعم بسيط جدا أول ما بتدخل بتحس براحة نفسية كبيرة من هدوء المكان وبساطة الديكورات والميوزك الهادى اللى تحس انك عاوز تستجم. أول ما بتدخل المطعم بيقابلك الجرسون بابتسامة هادية وبتقعد فى المكان اللى يريحك.. اصطاف العمل جنسياته مختلفة من دول أسيا وفيه كمان منهم مصريين . أهم حاجة بتميز المكان أنه مع الأكل ممكن تطلب مشروب ومفيش كحوليات. المنيو مرتب جدا ومكون من وجبات، وتحت كل وجبة مكوناتها وسعرها وأهم مايميز المنيو أن الاكلات الـ"سبايسى" مكتوب جنبها عشان تبقا عارف ومتتفجأش. وجبه مهراجا قررت أجرب وجبة "مهراجا".. الوجبة دى مكونة من نوعين من اللحم أو الفراخ وأرز ونودلز اللى بنقول عليها في مصر "مكرونة شرايط " وقطعة خضار أو سموسة على حسب ماتفضل. الوجبة على قد ماهى سبايسى جدا، على قد ما طعمها حلو اوى، الأكل ليه طعم تحس أنك بتاكل حاجة مختلفة، الفراخ بنفس الطعم بتاعنا بس حراق شوية، لكن المكرونة فيها مزازة حلوة اوى. دجاج ساتيه دجاج "ساتيه" دى بقا عبارة عن قطع دجاج متقطعة ومشوية على الجريل وعليها صوص الفول السودانى، وبيتقدم معاها أرز طعمه مش معجن ومفلفل وجميل، لكن الفراخ طعمها مكنش مختلف أوى والصوص تحس انه ريحته زى المفتقة، لكن طعمه مختلف عن ريحته. أخيرا.. الاسعار كانت حلوة، فلو حابب تاكل الاكل الاسيوى وتغير شوية، روح "Asian corner" الأكل جميل والمكان نضيف جدا.