لو حد قالك أنك شخص «مزاجي».. متسكتش العلاج أهو
جربت مرة تسأل نفسك ليه بتبقي كويس وفجأة مزاجك بيتغير وتحس أنك مضايق ومش قادر تعمل حاجة؟ طب حد قالك قبل كدة أنك شخص «مزاجي» وفكرت يعني أيه أو ليه بيتغير المود بتاعك بسرعة؟ طب فكرت لو حصلتلك الحالة دي هتتصرف إزاي؟
في التقرير ده «شبابيك» هيجاوبك على كل الأسئلة دي ويقولك إزاي تتعامل لما تيجيلك الحالة دي.
التغير المزاجي هو نوع من أنواع الاضطرابات اللي بتحصل للإنسان فجاءة بدون أي مقدمات، وتلاقي نفسك في حالة من الضيق بدون أسباب، بس لو راجعت نفسك هتلاقي أن ليها أسباب كثير، زي مثلا:
- تراكمات الماضي
يقول اخصائي الطب النفسي الدكتور إبراهيم مجدي إن التغير المزاجي يكون بسبب التعرض لضغوط لفترة مستمرة فيولد احساس بالكبت والخنقة في النهاية.
فأحيانا بتحصل مواقف المخ بيعديها لكنه بيخزنها، فتيجي في وقت كده يقوم مطلع النتيجة بتاعة التخزين وهي الاكتئاب، فيكون الشخص متضايق ومش عارف من أيه، وفاكر نفسه الموقف عدى ونسيه، لكن المخ بيخزنه.
- الروتين
من أسباب تغير المزاج والخنقة المفاجئة إن حياتك تفضل روتينية لفترة كبيرة نفس الأفعال كل يوم، ومفيش جديد في مسار حياتك وينتج عن الروتين نوع من أنواع الملل.
3 طرق لكسر الروتين.. إنك تتوه في الشارع واحدة منهم
- تغير الهرمونات
هذا السبب يخص أكثر النساء، نتيجة لتغير الهرمونات في فترة الدورة الشهرية مما ينتج عنه الخنقة والاكتئاب في بعض الحالات.
- نقص في الاحتياجات
ممكن قلة الأكل أو النوم تأثر بشكل كبير على المزاج بتاعك فحاول تراقب مواعيد نومك ونوعية أكلك عشان تعرف ده من أسباب الخنقة و لا لأ .
وهنا يأتي السؤال طيب أعمل أيه لو اتغير «المود» بتاعي فجأة؟
أولا: تقبل الحالة اللي أنت فيها وأعرف أنها مؤقتة مش هتدوم كتير.
ثانيا: حاول تتجنب أي جدالات ونقاشات مع عيلتك، وصحابك، ورئيسك في الشغل لحد بس ما تعدي الفترة دي.
ثالثا: جرب شيء جديد، بعد ما تتقبل فكرة أنك مخنوق ومضايق، أوعي تستسلم للحالة دي كتير وخرج نفسك منها بأنك تجرب شيء جديد زي: أكلة جديدة، ادخل سينما، العب رياضة، ارسم، غني، روح أماكن جديدة، واتكلم مع ناس جديدة، وساعد نفسك تعدي المرحلة دي وحدة وحدة.
من أكتر الحاجات اللي هتساعدك تعدي المرحلة دي قربك من ربنا، فصلي وادعي كتير هيفرق معاك.
علامات بتقولك لازم تغير طريقة حياتك فورا.. (اسمع)
خلي بالك
لو موضوع تغير المزاج بدأ يزيد ويتكرر بشكل مبالغ فيه ليصل لدرجة أنك تبقي الصبح في قمة السعادة والحماس وبدون أي أسباب تتحول السعادة لحزن بشكل كبير وبدأ ظهور أعراض أمراض جسدية مثل الصداع والتعب المستمر يبقي سبب الأعراض دي نفسي بشكل كبير، ويرجع لمرض أسمه الـBPD أو ما يسمي مرض «اضطراب الشخصية الحدي»
ويفضل ساعتها انك تروح لدكتور نفسي لأن علاج الحالة دي هيبقي سلوكي عن طريق الاستشارات النفسية وقد يكون دوائي حسب درجة إصابتك.
