رئيس التحرير أحمد متولي
 رايح الجيم لأول مرة.. 8 نصايح هتنفعك

رايح الجيم لأول مرة.. 8 نصايح هتنفعك

الرياضة من أهم الحاجات اللي لازم تهتم بيها في حياتك اليومية، لأنها هتساعدك تخلي حياتك أفضل وصحتك أحسن ودلوقتي بقي متاح أنك تشترك في أي جيم قريب من بيتك، أو شغلك إلخ..

بس قبل ما تقرر أنك تروح الجيم وتنتظم، في أساسيات مهمة لازم تعرفها قبل ما تروح «عشان متتفجأش».

«شبابيك» سأل أحد أصحاب الصالات الرياضية «كابتن فاتن» عن أهم النصايح اللي توجهها للمبتدئين في الجيم.

أولا: اعرف هدفك

لازم تعرف أنت رايح الجيم ليه، وكل ما تلاقي أسباب مقنعة لاشتراكك وانتظامك فيه هيكون دافع قوي ليك في أنك تستمر، واتعود في أي حاجة في حياتك أنك تعرف الهدف منها، وأسال نفسك دايما أنت بتعمل ده ليه.

 ثانيا: اختار مكان آمن

قبل ما تقرر أنك هتختار جيم معين لازم تعرف أكتر عن نظافته، وأمانته، والمدربين اللي فيه بحيث تبقي رايح وأنت مطمن أنك في أمان.

ثالثا: الميزان

لازم تبقي عارف أن الميزان مش مقياس أنك فقدت وزن، ممكن يبقي جسمك وزنه مثالي لكن جسمك غير متناسق مع بعضه فبالتالي مينفعش يبقي كل تركيزك في الجيم على أنك تخسر وزن على الميزان.

رابعا: الدايت مش كفاية

لازم تبقي عارف إن الدايت هو نظام بتمشي عليه فترة في الجيم ولما تبطل جيم بتوقف الدايت، فلازم تتعلم أزاي تاكل كأسلوب حياة مش بس مجرد نظام تمشي عليه فترة وتوقف. اعرف أيه الأكلات اللي بتفيد جسمك وتديك طاقة وأيه الأكل اللي هيضر جسمك.

خامسا: اعرف

لازم تبقي عارف كويس إذا كنت بتعاني من أمراض تمنعك من ممارسة بعض الرياضات، والتمرينات أو أنك تلعب على أجهزة معينة فلو كنت بتعاني من خشونة في الركبة لازم تقول للمدرب لخاص بيك.

سادسا: أول يوم جيم

أول يوم جيم ليك في تعليمات مهمة لازم تعملها منها:

  • اختار اللبس المناسب بحيث ميكونش عقبة ليك خلال ممارسة الرياضة فيفضل أن يكون واسع، وقطن، ومريح في اللبس.
  • اتعرف على أسماء الأجهزة واعرف كل جهاز بيفيدك في أيه.

سابعا: بلاش تبقي سخن

بلاش من أول يوم تبقى شديد وعنيف في التدريب عشان متتعبش أوي ويجيلك «شد عضل» أو أي أمراض تانية فأحرص أنك تسمع كلام المدرب وتنفذه عشان متتعبش أوي.

أخيرا: هتحس بوجع

بعد أول يوم ليك تمرين طبيعي أنك تحس أن جسمك واجعك وتعبان علشان تقدر تكمل بعد التدريب خليك حريص أنك تاخد «شاور» وتشرب حاجة دافية، وابعد عن أي مسكنات أو أدوية مجهولة المصدر.

أميرة خالد

أميرة خالد

صحفية مصرية متخصصة في الشأن الطلابي