مطعم «بكين».. أكل صيني على ضوء الشموع ميفوتكش
مؤمن إسلام:
لو بتحب تاكل صيني، أو بتفكر تجرب المطبخ الصيني، هعرفك نهارده على مطعم "بكين - Peking" وده أحد أبرز المطاعم اللي بتقدم أكل صيني في القاهرة.
المطعم ليه فروع كتير، ولأني من سكان المعادي أنا جربت فرع المعادي اللي في شارع النصر قدام مكتبة المعادي.
باب المطعم من الخشب وكأنه باب شقة لكنه على الطراز الصيني، بتفتح الباب وتدخل تلاقي ممر طويل طوله 4 متر تقريبا والإضاءة فيه خافتة، وعلى اليمين دولاب تعلق فيه جاكيت البدلة لو انت من الناس اللي بتلبس بدل.
لما تخلص الممر بتلاقي حد مستنيك ويسألك عن العدد وإن كان فيه حجز باسمك ولا لا، بعدين بياخدك على ترابيزتك لو كنت حاجز أو على ترابيزة مناسبة للعدد. كل ترابيزة عليها شمعة بيولعها الجارسون مجرد ما تقعد، وبيسيبك ويروح يجيبلك المنيو
المكان هادي والإضاءة فيه خافتة ومريحة للأعصاب مع الأغاني السلو اللي شغالة بتخليك تنسى الوقت وهمومك.
المنيو
منيو مطعم بكين كبير شويه وكان فيه مشكلتين في نظري، الأول أنه فيه أكل مصري ولبناني بجانب الأكل الصيني، فلو انت مش عارف الأكل الصيني ممكن تطلب أكل لبناني مثلا على أساس أنه صيني. عشان كده اسأل على كل أكله الاول.
المشكلة التانية إن الأكل الصيني عندهم غالي جدا بالمقارنة بمطاعم صينية كلت فيها قبل كده
طلبت (سبرينج رول) أو فطائر الربيع - زي ما المطعم مترجمها في المنيو- 5 قطع ، ورز بالفراخ، ولحم بصوص السيشوان (توابل صيني حارة)، وورق عنب بارد – يعني بالرز مش باللحم – وشربة بكين بقطع الفراخ وعيش الغراب.
طبعا بجانب الأكل كان في 3 أنواع صوص، منهم صوص سبايسي جدا وهو عبارة عن فلفل حار مع بهارات تاني.
بالنسبة للرز بالفراخ والخضار
فكان بالنسبالي سيئ جدا لانه مش سبايسي والفراخ فيه مش متبلة.. م الآخر طلعت افتكاسة مصري مش صيني ومش حلوة.. ده بجانب أن الطبق صغير جدا وبـ 15 جنيه تقريبا.
ورق العنب
كان جميل جدا، وتحس كده أنه مزز كده وبيفتح شهيتك للأكل. أما بالنسبة لفطائر الربيع فدي كانت ممتازة وأفضل (سبرينج رول) كلتها في حياتي.. كانت مقرمشة والحشو جميل مش قليل ومش كتير.
وبالنسبة للشربة فكانت مش بطالة بس تقيله شويه.. يعني هتخليك تشبع قبل م تخلص أكل.
نيجي للحم اللي بصوص سيشوان بصراحة كان عادي رغم أن سعره مش عادي خالص بـ 70 جنيه تقريبا.. طريقة تقديمه هي اللي كانت مميزة.. الطبق كان محطوط على زي حامل كده وتحت منه شمعة مخليه الطبق سخن طول م أنت بتاكل
في النهاية الأكل في مجمل كويس، والمكان هادي وجميل وتعامل الناس اللي شغالة في المكان تعامل ممتاز، وتقييمي للمكان 7 من 10.. لو عايز تجرب الأكل هناك دي صفحتهم على فيسبوك (مطعم بكين ) والرقم المختصر للمطعم 16078
