لو حامل.. العبي مع النونو رياضة بالشروط دي
لو إنتي من النوع اللي بيحب يمارس الرياضة بس مقلقة في فترة حملك عشان متأثريش على الجنين، متقلقيش لأنك هتقدري تلعبيها إنتي والنونو بس بشروط معينة هتعرفيها في الموضوع ده.
أول 3 شهور
دكتور النساء والتوليد عمرو عباسي بيقولك إن أول 3 شهور في حملك مش مستحب إنك تلعبي رياضة، لأن هرمونات الحمل بتكون غير مستقرة فمش هتكوني قادرة إنك تعملي حاجة وممكن تكوني عرضة إن يحصلك مضاعفات.
خايفة من الحمل والولادة؟.. الخطوات دي هتساعدك
الشهر الرابع
أما بعد الـ3 شهور فممكن تلعبي رياضة بس بشرط إنك تكوني أصلًا من النوع الرياضي اللي متعود في حياته عامة إنه يلعب رياضة. ولازم تخلي بالك إن مجهودك يكون معتدل وإنتي بتلعبيها ومتبذليش مجهود زيادة لأن ده هيأثر على هرمونات حملك.
وده أضراره إنه يحصلك تيبس في أربطة الجسم، ومش هتبقى متماسكة زي الأول وصعوبة في التنفس وجسمك هينتفخ. ورياضة السباحة من الرياضات المستحبة ليكي وكمان رياضة المشي.
ولو إنتي مش من النوع الرياضي يبقى مش مستحب إنك تلعبي رياضة في حملك. والحاجة الوحيدة اللي ممكن تعمليها هو إنك تعملي تمارين تفتيح الحوض عشان الولادة بتاعتك تكون طبيعية وميحصلش ليكي تشنجات أثناء الولادة.
للحوامل.. خلي بالك الأطعمة والمشروبات دي خطر
أول التاسع
في أول الشهر التاسع مارسي رياضة المشي واعملي تمارين تفتيح الحوض عشان زي ما قولنا ولادتك تكون طبيعية وميحصلش ليكي تشنجات أثناء الولادة، وفقًا لكلام «العباسي».
غيري فكرتك عن الحمل.. «متاكليش لاتنين»
بعد الولادة بـ40 يوم
أما بقى بعد فترة الحمل بـ40 يوم فلو إنتي والدة طبيعي ممكن تعملي رياضات معينة خاصة بالثدي والبطن عشان ميحصلش ليهم ترهلات. وبالنسبة لتمارين الثدي نامي على ضهرك وامسكي دامبلز في ايدك اليمين والشمال وابعديهم وضميهم وهكذا كأنك بتلعبي فتحي ياوردة قفلي ياوردة كدة J أما لو والدة قيصري دكتور «عباسي» بينصحك إنك لما تيجي تعملي تمارين بطن اعمليها بحرص شديد.
وطبعًا لما تروحي الجيم هتقدري تعملي التمارين المناسبة ليكي واللي هتسألي عليها المختصين هناك بس لازم طبعًا قبل ما تروحي يكون الدكتور بتاعك عارف عشان يقولك تعملي إيه وده عشان تحافظي على سلامتك وسلامة طفلك :)
