4 كافيهات مميزة في وسط البلد.. هتتبسط ومش هتدفع كتير
زهقت من كتر الكافيهات المعتادة اللي بتروحها وعايز تغير؟ في الموضوع ده هنقولك على كافيهات في وسط البلد فيها روحها وروقانها بتوع زمان Jوكمان مش هتدفع كتير.
كافيين
أول ما تدخل الكافيه هتحس إنك في كافيه برا مصر من كتر ما هو غالب عليه الإستايل الأمريكي في نظام ديكوراته ده غير إنه مشغل أغاني أجنبية على طول والأغاني دي طبعًا بتخلق جو من الهدوء والروقان.
الكافيه مشهور بأنه بيعمل كل أنواع القهوة اللي أنت عايزها وأسعارها في متناول الإيد يعني مثلًا القهوة الإسبرسو بـ9 جنيه والتركي بـ10. ولما تطلب منه قهوة معينة بيطحنلك البن مخصوص.
مش بيطلع بن كان مطحون ويعملك بيه لأنه بيشوف إن ده بيخلي القهوة طازة وليها طعمها الخاص. وكمان عنده جميع أنواع الأعشاب اللي بيحطها على حسب طلبك على المشروبات ده غير إنه مميز بعمل الهوت شوكليت المكسيكي الحار، وبيقدم ليك كمان حلويات ومخبوزات.
بيوفر الكافيه ليك مساحة للمذاكرة ليك مع أصحابك لأنه عبارة عن دورين مساحتهم كويسة وكمان بيوفر ليك مساحة إنك تعرض موهبتك لو عندك موهبة الرسم مثلًا وعايز توري رسوماتك للناس ممكن تروح ليهم وتتفق معاهم وهيعرضوها عندهم وتعمل إيفينت ليك وهما بيدعموك وبيعملوا ليك دعاية.
عنوانه: 28 شارع شريف ممر مطعم ماكدونالد أمام حلواني سيموندس، وسط البلد.
كونست
الكافيه ده من الكافيهات اللي هتتبسط وأنت قاعد فيها لأنه مريح نفسيًا وفيه كتب كتيرة ينفع تستعيرها وتقراها وأنت قاعد وينفع كمان تشتري منها. كمان فيه إكسسوارات حلقان وسلاسل شكلها شيك جدًا وتجمع بين الطابع الكلاسيكي والعصري.
ولو عايز رسمة بورترية الكافيه يعرف حد يعملك الرسمة دي. وأسعار المشروبات والحلويات كويسة يعني أقل مشروب عنده 8 جنيه. ومفيش شيشة ودي حاجة كويسة لو مش بتحب تقعد في مكان فيه دخان. والكافيه بيتعمل فيه إيفينتات مثلًا ندوة شعرية وحفلات توقيع كتب وأعياد ميلاد.
عنوانه: 28 شارع شريف ممر مطعم ماكدونالد أمام حلواني سيموندس، وسط البلد. جنب كافيه كافيين.
عيش وملح
الكافيه من جوا مساحته واسعة ألوانه زاهية وديكوراته مودرن ومع كل ده أسعاره في متناول الكل سواء الأكل أو المشروبات. مش بيقدم شيشة. وبيعمل إيفينتات لعروض أفلام وعزف موسيقى وغنا وعرض منتجات كل شوية يعني هيبقى فرصة حلوة إنكوا تتفسحوا فيه.
ولو عايز تعرض منتجات أو عندك موهبة زي العزف مثلًا وعايز تعمل حفلة ممكن تعملها عندهم وهما بيدعموك بدعاية كويسة كمان لو عايز تخلص شغل أو لو عايز تذاكر أنت وأصحابك تقدر تروحلهم وتذاكر في روقان وسط الألوان الزهية والبراح الواسع.
عنوانه: 20 شارع عدلي أمام المعبد اليهودي وسط البلد
فلك
أما كافيه فلك فتحسه قصر صغير من بتوع زمان وجوا الكافيه تحس إنك قاعد في صالون ثقافي من بتوع زمان برده. بيشغل أغاني باندات وأغاني قديمة بتدخلك جو عالم تاني.
أسعاره برده معقولة سواء الأكل أو الشرب. وبيتعمل فيه ورش تعليمية وإيفينتات فنية وبيبيع إكسسوارت وملابس ويغلب عليها الطابع المصري الأصيل :)
عنوانه: 7 جمال الدين أبو المحاسن، جاردن سيتي، قدام مسرح السلام، جنب حزب المؤتمر.
