هزيمة السرطان بتبدأ من هنا.. نصايح للحافظ على جمالك

تقدري تهزمي مرض السرطان وتعتبريه مرض عادي زي أي مرض رغم صعوبته. والحفاظ على جمالك هو نوع من التغلب النفسي على المرض، والنصايح دي من خبيرة التجميل وصال المصلوحي هتساعدك بشدة.

المعايشة مع المرض

«المصلوحي» بتقولك إنك لازم في البداية تتعايشي مع الموضوع ومتخليش المرض ياخد حيز كبير من نفسيتك ومتستسلميش ليه أبدًا عشان عدم استسلامك ليه هيخليكي قادرة إنك تتخطيه وتتخلصي منه، فعيشي حياتك بطبيعية.

ويمكن المطربة الفلسطينية ريم البنا هي أكبر دليل على التعايش مع إصابتها بسرطان الثدي والتصدي ليه وكمان تخطيه والشفا منه واحدة واحدة.

الشعر

«المصلوحي» بتقولك إن ممكن تعملي قصات معينة لشعرك زي مثلًا قصت «أل جارسون»، وممكن كمان تلبسي باروكة وعشان تجيبيها روحي أي محل لبيع الشعر أو لو روحتي أي بيوتي سنتر هو هيجبها ليكي.

المطربة الفلسطينية ريم البنا في قصت أل جارسون 

متقلقيش من شكلها، الباروكة فيه ناس كتير قوي سواء زمان أو دلوقت بيلبسوها وبيكون شكلهم حلو فيها.

وكمان بيكون فيه كريمات بتعالج الشعر بس بتسألي عليها الدكتور بتاعك الأول وبعدين بتروحي للبيوتي سنتر بيكملوا ليكي علاج الشعر بإنهم بيعملوا ليكي حمام كريم وأنبولات لتنبيت الشعر وسبراي بينشط الدورة الدموية في فروة الراس.

الحواجب

أما بقى الحواجب فممكن تروحي الكوافير وتعملي حنة للحواجب أو تستخدمي بودر للحواجب وكمان تركبي رموش. واهتمامك بإنك تكوني جميلة على الرغم من تأثير المرض عليكي هيخليكي كويسة نفسيًا لأن دايمًا الواحد لما يشتري حاجة أو يغير حاجة في شكله نفسيته بتبقى كويسة.