هتدخل فنون تطبيقية؟.. يبقي لازم تعرف المعلومات دي
خلصت الثانوية؟ ولقيت صحابك بيقدموا في اختبارات قدرات كلية فنون تطبيقية؟ واختبرت معاهم ونجحت؟ طيب ألف مبروك.
بس انت تعرف حاجة عن فنون تطبيقية؟ تعرف هتدرس إيه؟ طب هتطلع منها تشتغل إيه؟ «شبابيك» في التقرير ده هيجاوبك على كل الأسئلة اللي بدور في دماغك.
إيه هي كلية فنون تطبيقية؟ هتطلع منها إيه؟
بص يا سيدي كلية تطبيقية كلية بتخرج مصممين، مصمم أي حاجة من اللي موجودة حواليك، حرفيا من الابرة للصاروخ.
مبتخرجش ولا رسامين ولا مدرسين رسم إلا بقي لو أنت حابب ده زي مصممين الديكورات، والعربيات، والإعلانات، والسيراميك، والمجوهرات، والمطبوعات إلخ..
وهي مزيج من الهندسة (مواد هندسية زي الرسم الهندسي، والمنظور الهندسي، والهندسة الوصفية) والفن، بالإضافة لبعض المواد العلمية والثقافية، من الآخر أبسط وصف للكلية أنها بتخرجك نصك مهندس ونصك التاني فنان.
خلصت ثانوية عامة.. اسمع بقى نصيحة السابقين
تدخلها من علمي ولا من أدبي؟
لازم تكون علمي، وليها امتحان قدرات لازم تنجح فيه الأول قبل ما تدخلها.
الدراسة كام سنة؟
الدراسة 5 سنين، وأول سنة زي هندسة كدة بتتسمي إعدادي.
موجودة في جامعات إيه؟
جامعات حكومية زي: حلوان- وبــنها- ودمـياط - وبني سويف.
كليات خاصة زي:
جامعة 6 أكتوبر- وجامعة أكتوبر الحديثة للعلوم والآداب MSA- والجامعة الالمانية بالقاهرة GUC - وجامعة فاروس بالإسكندرية PUA- وجامعة بدر.
والمعاهد العليا زي:
المعهد العالي للفنون التطبيقية بالسادس من أكتوبر- والمعهد العالي للفنون التطبيقية بالتجمع الخامس.
إيه المواد اللي هدرسها في أول سنة؟
أول سنة دي بتبقى سنة عامة حاول تجيب فيها تقدير عشان تختار القسم اللي تفضله، والمواد اللي هتاخدها:
في الترم الأول هتدرس عناصر طبيعة- ورسم هندسي- ومنظور حر- ومباديء قانون- وكيمياء- ورياضة.
وفي الترم التاني هتدرس هندسة وصفية- ومتاحف- وحاسب آلي- وعلم اجتماع- وميكانيكا- وفيزياء.
طب إيه الأقسام بتاعتها؟
الكلية الأم اللي هي حلوان فيها حوالي 14 قسم بس هما مش موجودين كلهم في كل الكليات، الأقسام دي زي:
قسم التصوير الفوتوغرافي:
هتدرس فيه التصوير الفتوغرافي والسينمائي والتلفزيوني، وهتتعلم تبقي متخصص في التصوير بجد.
قسم الطباعة النشر والتغليف
قسم الإعلان:
القسم ده هتدرس فيه الألوان وتأثيرها على عين المتلقي، وإزاي تجذبها بكل الطرق وتحدد الفئة المستهدفة للإعلان عشان توصلهم القيم التشكيلية مثل الكتلة والفراغ والألوان والثقل.
قسم التصميم الداخلي والأثاث:
ده مسؤولياته التصميم الداخلي في الأعمال الهندسية والفنية والتكنولوجية والتطبيقية التالية زي المباني والمنشآت، والتركيبات الداخلية لتوصيلات الكهرباء والمياه الصحية وتكييف الهواء ومختلف التكسيات وأساليب معالجة الحوائط والأسقف والأرضيات.
قسم الأثاث والانشاءات المعدنية الحديدية:
هتتعلم فيه إزاي تبقي مصمم أثاث ناجح فأنت بتتعلم أسس التصميم.
قسم الملابس الجاهزة:
هتتعلم فيه إعداد العينة، وإعداد الباترون، وتخطيط وإدارة الإنتاج، ومتابعة خطوط الإنتاج ومراقبة الجودة، والمبيعات وتسويق الملابس.
قسم التصميم الصناعي:
هتتعلم فيه تصميم الأجهزة والمعدات وأساليب تطبيقها وإنتاجها بالطرق الهندسية والفنية والتكنولوجية والصناعية المختلفة للمجالات زي المجال الزراعي والسياحة وسائل الاتصال.
وفي أقسام تانية زي: قسم المنتجات المعدنية والحلي- وقسم الزجاج- وقسم الخزف- وقسم الزخرفة– وقسم النحت والتشكيل- وقسم الغزل والنسيج والتريكو– وقسم طباعة المنسوجات.
إيه الأدوات اللي هتحتاجها؟
فيه شوية أدوات مكلفة شويتين هتحتاج تجيبها أول السنة زي: مثلث ارسطو- والمسطرة حرف T - والاسكتشات- وأقلام رصاص بمختلف درجاتها من H لـ 8B -وبالطو أبيض- وألوان تالنز.
