رئيس التحرير أحمد متولي
 كل المعلومات عن كلية التجارة.. هتلاقي كل اللي تعرفهم هناك

كل المعلومات عن كلية التجارة.. هتلاقي كل اللي تعرفهم هناك

كلية تجارة بيتجمع فيها طالب الثانوي شعبة علمي علوم اللي أول السنة بيقول أنه هيدخل طب، وطالب علمي رياضة اللي بيقول إنه هيدخل هندسة. بيتقابلو كلهم هناك، ويمكن ده السر في إن اسمها «كلية الشعب».

المهم يا سيدي لو كنت من سعداء الحظ اللي هيدخلوا الكلية دي يبقي في شوية حاجات لازم تعرفها.

أولا: في تجارة شعبة إنجليزية «تجارة إنجلش» وشعبة «تجارة عربي» وفي شعبة تالته كده في جامعة القاهرة بس اسمها «برنامج جورجيا» ودي هنتكلم عنها كمان شوية.

طب إيه الفرق بين تجارة «إنجلش» و«عربي»؟

الفرق بينهم غن ده بياخد المواد بالإنجليزي والتاني بالعربي ? وفي بعض المواد الزيادة في الشعبة الإنجليزية.

وفي فرق برضو في المصاريف، السنة في تجارة إنجلش بـ 10 آلاف جنيه تقريبا.

طيب لو عاوز تدخل «تجارة إنجلش» إيه الشروط؟

دخولك الشعبة الإنجليزي بيعتمد على مجموع دراجتك كلها + درجة الإنجليزي ودا بيختلف من جامعة لجامعة، يعني السنة اللي فاتت جامعة عين شمس خدت من 417 لكن القاهرة خدت من 428 درجة وهكذا.

ثانيا: كلية تجارة زي كتير من الكليات اللي بتختلف في تخصصاتها من جامعة للتانية يعني مثلا:

  • كلية تجارة عين شمس فيها 3 تخصصات بس «محاسبة- إدارة- رياضة».

  • كلية تجارة جامعة القاهرة فيها 4 «محاسبة -إدارة- اقتصاد-إحصاء».

  • تجارة الشيخ زايد دي بقي اللي ملحقش مجموع القاهرة بيروح هناك بس امتحاناته بتبقي في جامعة القاهرة هي زي جامعة تابعة لجامعة القاهرة.

برنامج جورجيا

في شعبة موجودة في كلية تجارة جامعة القاهرة وهي حاليا مصاريفها معدية الـ 30 ألف جنيه، وفي الشعبة دي بتدرس برنامج من جامعة جورجيا الأمريكية، وبيكون تعليمك منفصل عنهم ونظام أمريكي. وتخصصات البرنامج ده 3 «التمويل والاستثمار- المحاسبة- التسويق».

مميزات البرنامج ده إيه؟

1- لما تتخرج بيبقي معاك شهادة بكالوريوس مشترك بين جامعة القاهرة وجامعة جورجيا في أمريكا.

2- ممكن أن تكمل الدراسة في الصيف بجامعة ولاية جورجيا نفسها.

3- العدد قليل أوي.

طب أقدم فيها إزاي؟

التنسيق عادي بتحط في الرغبات تجارة عربي، وتروح تقدم في البرنامج ده ولازم تكون جايب أكتر من 40 في اللغة الإنجليزية وبتدفع المصروفات، ولازم بعد ما تقدم يبقي في مقابلة شخصية ليك والأولوية للشخص الكويس في مهارات الإنجليزي.

ثالثا: كلية تجارة وإدارة أعمال جامعة حلوان

ودي يا سيدي فيها 7 أقسام وهما «المحاسبة- العلوم السياسية- إدارة الأعمال- الاقتصاد- نظم المعلومات الإدارية- التجارة الخارجية- الرياضيات والتأمين والإحصاء».

التخصص في كل الجامعات دي بيبقي من بعد سنة تانية.

طيب إيه مجالات اللي ممكن أشتغل فيها لما اتخرج؟

أنك تشتغل في القطاعات المالية الخاصة والحكومية في البنوك، وشركات التأمين، والبورصة.. إلخ.

وكمان تشتغل باحث اقتصادي، أو في العلاقات الدولية والسياسة الخارجية والإدارة العامة وممكن تشتغل في المحاسبة زي «المحاسبة المالية- الضرائب».

أميرة خالد

أميرة خالد

صحفية مصرية متخصصة في الشأن الطلابي