آثار كلية علوضعها بس الزمن بيتغير.. اعرف كل حاجة عنها

كلية آثار زيها زي كليات كتير مهدور حقها في التعريف بيها وفي ناس بتخاف تكتبها في التنسيق عشان ميعرفوش عنها حاجة. و«شبابيك» هتعرفك كل المعلومات اللي ممكن تحتاجه عن الكلية في التقرير ده بطريقة سؤال وجواب.

هتدرس إيه أول سنة؟

سنه أولي هتدرس فيها كل المواد عن كل الأقسام زي مثلا:

آثار إسلامية، وترميم عضوي، وترميم غير عضوي، وآثار يونانية ورومانية، وتاريخ إسلامي، وإنجليزي، وقوانين حماية الآثار، وحقوق إنسان، وماده حاسب اللي هتتعلم فيها برامج توثيق الآثار على الكمبيوتر.

طب الدراسة بلغة إيه؟

آثار فيها شعبيتين شعبة عربي ودي الدراسة عادي باللغة العربية، وكمان شعبة إنجليزي بس ليها شروط زي درجتك في اللغة الإنجليزية وليها مصروفات ممكن تصل لـ10 آلاف جنيه.

طيب ينفع أدخلها لو أنا علمي؟

أيون ممكن تدخلها سواء من علمي أو من أدبي، قسم أسمه «ترميم معماري» ده لطلاب علمي وده هيكلمك بالتفصيل عنه كمان شوية.

طيب إيه الأقسام اللي في الكلية؟

أولا متقلقش التخصص لسة من سنة تانية بس هقولك نبذة عن كل قسم الكلية فيها 4 أقسام:

قسم مصري

هتدرس فيه التاريخ المصري واللغات القديمة وعمارة وفنون.

قسم يوناني وروماني

وده هتدرس فيه اللغة اليونانية والمدن اليونانية والرومانية والعمارة لكل منهم والأساطير اليونانية.

قسم إسلامي

هتدرس فيه أي حاجة عن التاريخ الإسلامي والمساجد والمباني الدينية والدول الإسلامية بداية من فتح مصر وبرضو بتاخد جزء صغير عن التاريخ الفرعوني.

قسم الترميم

وده بيتقسم لي 3 أقسام داخلية: قسم ترميم عضوي، وقسم ترميم غير عضوي، وقسم ترميم معماري ده لشعبة علمي بس.

والقبول في قسم الترميم على أساس كورسات بتتعمل لطلاب أولي قبل الدراسة بتاعت سنه تانية، وبعد كده بتمتحن امتحان ولو نجحت بتدخل القسم.

طيب إيه هي مجالات الشغل؟

ممكن تشتغل في وزارة الثقافة، أو هيئة الآثار: أخصائيين ترميم، وأمناء متاحف أو مخازن، وممكن بعد متخلص كلية تعمل دبلومة تربوي وتشتغل مدرس تاريخ أو تعمل دبلومة إرشاد وتبقي مرشد سياحي.