يعني إيه كلية البنات؟ طب وليه؟
كتبت- ندى عثمان:
كتير بنسمع عن كلية البنات، بس أنت تعرف إيه عنها؟ في التقرير ده هنعرفك بالتفصيل على كلية البنات وفيها إيه، وعبارة عن إيه، وليه سموها كده.
كلية البنات واضح من الاسم إنها كلية للبنات بس، ومفيش كليات للبنات بس غير في جامعة عين شمس. وهي عبارة عن 3 كليات داخل كلية واحدة: كلية آداب، وكليةعلوم, وكلية تربية.
طب إيه اللي في كلية البنات؟
-
كلية علوم: ودي بتقبل طلبات الثانوي العلمي بنسبة 92.3%. وفيه 6 أقسام داخلية وهي: رياضة، وكيمياء، وفيزياء، والنبات، والكيماء الحيوية، والحيوان.
-
كلية الآداب: بتاخد طالبات الثانوي علمي وأدبي، وبتقبل من 363.5 درجة لطلاب أدبي. وفيها 8 أقسام داخلية وهي: اللغة العربية، واللغة الانجليزية، واللغة الفرنسية، والتاريخ، والجغرافيا، وفلسفة، وعلم النفس، وعلم الاجتماع.
وقسم علم الاجتماع ده فيه 3 تخصصات: قسم اجتماع، وده بتدرس فيه كل شيء خاص بعلم الاجتماع، وقسم الإعلام: والمواد زي مواد كلية إعلام بالظبط، وقسم الانثربولوجي: وده بتدرسي فيه علم الإنسان والعادات والتقاليد وتراث الشعوب وغيره.
-
كلية تربية: وبتاخد طالبات الثانوي علمي وأدبي، وبتقبل من 363.5 درجة لطلاب أدبي. وفيها 3 أقسام: طفولة، وأساسي، وعام.
شروط هذه الأقسام
طب إيه هي مجالات الشغل بعد التخرج؟
كلية البنات تعادل أي كلية عادية، فاذا كنتي متخصصة في كلية العلوم هيبقى زيك زي أي شخص خريج علوم وممكن تشتغلي في معامل للتحاليل والأشعة، أو في شركات الأدوية، وده بيبقى على حسب تخصصك داخل الكلية.
أما كلية الآداب عندك مجالات كتير، فاذا كنتي من قسم الاجتماع تخصص إعلام ممكن تشتغلي في مجال الاعلام، أما تخصص الانثربولوجي فبتشتغلي في مجال أبحاث الاجتماع، وباقي الأقسام بيبقى متاح ليكي نفس مجالات خريجي آداب.
أما اذا كنتي في تربية فهتبقي في مجال التدريس بانواعه (ابتدائي، واعدادي، وثانوي) وده على حسب تخصصك داخل الكلية.
ليه سموها كلية البنات؟
كلية البنات جامعة عين شمس كانت عبارة عن معهد عالي، ومع صدور قانون تنظيم الجامعات عام 1956 أصحبت كلية، أما في عام 1994 سُمّيت بـ كليــة البــنات للآداب والعلــوم والتربيـة، وهي مختصة بتعليم الفتاة بوصفه قضية وطنية.
