بتحب الأطفال؟.. الكلية ديه هتعلمك تتعامل معاهم إزاي

كلية رياض الأطفال من الكليات المهمة جدًا لأنها بتساعد في تعليم وتكوين عقلية النشئ بشكل كبير وبتساهم في حل مشاكل خاصة بيهم، وبتأهل طلابها لكيفية التعامل الأمثل مع الأطفال.

خلال هذا التقرير «شبابيك» هيعرفك كل حاجة عن الكلية.

أولا: كلية رياض الأطفال بتختص بتعاليم الطلاب كيفية التعامل مع الأطفال من المهد حتى سن 4 سنين وعشان تتقبل في الكلية بيبقي ليك الأول مقابلة شخصية عشان يشوفوا أنك شخص مؤهل لده ولا لأ.

ثانيا: الكلية مدة دراستها 4 سنين.

ثالثا: الكلية فيها 4 أقسام بتختار القسم اللي عاوز تدخله من سنة أولي علي حسب دراجتك في الثانوية العامة.

أقسام الكلية:

♠ قسم عربي:

وده بتدرس فيه التعامل مع  الروضة من سن سنتين حتى أربع سنين وده أعلى قسم من حيث الدرجات لطلاب الثانوية العامة.

♠ قسم تربية خاصة:

القسم ده خاص بتعليم الطلاب إزاي يتعاملو مع الأطفال اللي عندهم صعوبات في التعلم وبينقسم لقسمين داخليين:

الأول: التلعثم اللي هو «اللدغة والتعتهة والصعوبة في الكلام».

التاني: الإعاقة العقلية وده بيعلمهم التعامل مع الأطفال ذوي التأخر العقلي.

♠ قسم حضانة:

خاص بدراسة كل ما له علاقة بالأطفال لحد سن سنتين.

♠ القسم الإنجليزي:

ده قسم خاص داخل الكلية وهتدرس فيه نفس مواد القسم العربي بس باللغة الإنجليزية.

طيب إيه المواد اللي هتدرسها؟

♠ بتدرس 7 مواد في الترم ماديتين منهم اختياري، أول سنة بيبقوا دراسة مواد عامة زي:

«مدخل للعلوم للتربوية - متطلبات جامعة - منهج أنشطة- تدريب ميداني...»

بعد كدة من سنة تالتة بتنزل تدريب عملي في مدارس أطفال وحضانات.

مجالات الشغل

كل مجالات التدريس في مدارس الأطفال والحضانات المختلفة متاحة لك العمل فيها، كما ممكن تلتحق بأي إدارات للعمل أخصائي إجتماعي أو HR في مؤسسات القطاع الخاص.