مش فاهم نفسك طيب ولا ساذج؟.. ده الفرق عشان مينضحكش عليك
إزاي أبقى طيب وفي نفس الوقت مش ساذج؟ أكيد سألت نفسك السؤال ده في يوم من الأيام من كتر ما طيبتك بيفسرها الناس على إنها سذاجة، لكن في الموضوع ده هنقولك رأي الطب النفسي ووجهة نظر الناس.
دكتور الطب النفسي جمال فرويز بيشوف إن مفيش حاجة اسمها كده :) ، وبيؤكد أن الفرق الوحيد هو بين ناس بتتعامل بأخلاقيات وناس بتتعامل بلا أخلاقيات.
ويوضح أن الإنسان الطيب بيتعامل وفق الأخلاق والقيم والموروثات اللي اتربى عليها، يعني أنا لما مريض بيجي ليا ومش هيقدر يدفع تمن الكشف بدخله عادي يكشف وأنا اتعاملت معاه وفق للأخلاقيات اللي اتربيت عليها ممكن حد يبص عليا إني مغفل لكن هو حر في نظرته دي وأنا مليش دعوة برؤية الأخرين ليا أنا بتعامل بأخلاقي.
وبيأكد «فرويز» أن زي ما فيه ناس بتبص على طيبة الشخص إنها سذاجة فيه ناس تانية بتبص على إن طيبة الشخص وراها غرض سيء ودي بتكون شخصية سيكوباتية بتشوف إن أي حد بيعمل حاجة بيكون وراها غرض سيء لأنه بيتخيل الناس سيئة الظن زيه، وبرضه الشخص الطيب مش مسؤول عن نظرته ليه إن طيبته دي وراها غرض سيء.
ويضيف أن الشخص الطيب عليه أن يتعامل باللي شايفه هو صح وميهتمش أبدًا بتحليل الناس ليه إذا كانت طيبته دي سذاجة ولا وراها غرض سيء.
احذر.. أسوأ 8 أخطاء ترتكبها في سن العشرين
التعامل مع الشخص اللي بيشوفك ساذج
«فرويز» بيقولك إنك تقولوا أنا عملت الفعل ده عشان كذا هو بقى اقتنع كان بها، مقتنعش دي حاجة تخصه، وأنت حر في الأول وفي الأخر في اللي بتعمله.
مدافعش عن نفسك
وبيأكد «فرويز» على إنك مش مجبر تدافع عن نفسك وكأنك متهم عشان تغير وجهة نظره تجاهك بعد ما عرف السبب منك، لأن دي وجهة نظره وهو حر فيها وأنت ملكش دعوة برؤية الأخرين ليك.
وده كان رأي الطبيب النفسي اللي خلاصته إن مش مهم نظرة الناس ليك، المهم نظرتك أنت للي بتعمله واللي أنت حر فيه. ولما اتكلمنا مع الناس في الموضوع ده كانت آرائهم مختلفة.
أخيرا.. حل لغز «مثلث برمودا» الذي حيّر العالم
خليكي مع ربنا
ياسمين سليم شايفة إن «ربنا عارفك كويس قوي وطول ما أنتي قريبة منه هيديكي حالة من التصالح والثقة بالنفس تخليكي لما حد يقولك إن طيبتك دي سذاجة متتوتريش وتحاولي تثبتي عكس نظرته ليكي وده لأن الناس كده كده بيتكلموا وبيحكموا».
وكلام «ياسمين» ده بيتفق مع رأي «فرويز» في فكرة إنك متحاوليش تثبتي لحد حاجة. وبرضه إسراء عماد بتتفق مع «فرويز» و«ياسمين» في إنها بتقول «سيبي الناس تفتكر أنك ساذجة ومتحاوليش تثبتي العكس».
الساذج مؤذي
و«ياسمين» بتشوف إن «اللي بيسيب حقه مش شرط يبقي طيب وساذج ممكن يكون قادر جدًا ومؤذي ويقدر يجيب حقه ومش ﻻزم يبين ده للناس في الوقت ده، وفي الحالة دي يبقى هو قوي مش ساذج».
زمن مفيهوش ساذج
ياسمين حماد بتقول إن «اللي بيتعامل بسذاجة مع حد بيبقي شايف نفسه أذكى وفاهم وأعلى منه وإن اللي قدامه مش فاهم أو أهبل بس هو في الحقيقة اللي بيبقى ساذج عشان احنا في زمن مفيهوش حد أهبل ولا ساذج بس في شخص طيب».
لو عايز تبقى جذّاب.. ابعد عن الصفات دي
للطيبة حدود
نجوى محمد بتقول «كنت بتعامل بطيبة في الشغل ومع إخواتي وكنت بجي على نفسي كتير لو حد غلط فيا بسامحه ولو حد استقصدني وضغط عليا في الشغل بسامحه برضه لغاية ما كتر الضغط النفسي خلاني أقف مع نفسي وأحط حدود للطيبة دي وأقول إني لازم أتغير وفعلًا اتغيرت واتقلبت شخصيتي 180 درجة من واحدة طيبة ساذجة في نظر الناس لواحدة قوية تعرف إمتى تقول لأ ومتسمحش لحد أبدًا إنه يغلط فيها والكل عاملي ألف حساب».
الفرق بين الطيبة والسذاجة شعراية
ريم علي عدلي بتوضح «الشعراية» اللي بتفصل بين معنى الطيبة والسذاجة وبتقول إن «الطيب بيبقى متسامح مع حد مثلًا استغله أو آذاه بس في نفس الوقت يقدر ياخد موقف لو لقي الموقف بيتكرر تاني وتالت ومش هيتضحك عليه تانى يعني، أما الساذج هو اللي ممكن يفضل يتضحك عليه والناس تستغله وهو برضه مش بياخد موقف ولا بيتعلم من اللي حصله».
