تحت 18.. إزاي تستغل وقت فراغك في المرحلة دي؟
الفراغ من أصعب الأوقات اللي بتمر على الواحد في حياته وخصوصًا في مرحلة العمرية بين 10 و18 سنة، اللي مفروض إنها مرحلة تكوين الذات.
ولو بتسأل نفسك إزاي أعود نفسي في المرحلة دي على استغلال وقت فراغي؟ هتعرف الإجابة في الموضوع ده.
تحت 18
خبيرة التنمية البشرية بسمة سليم بتقول إن فترة «تحت 18» بيحس فيها الواحد من جواه إنه عايز يظهر قدراته ويقول للناس «أنا خلاص كبرت» وللأسف بيعبر عن إحساسه ده بشكل سلبي فبيبدأ يتعامل بشكل سيء مع والده ووالدته على إعتبار إنه خلاص كبر ومش عايز حد يتحكم فيه.
وفي الفترة «تحت 18» الطفل بيكون شخصيته هوائية مش مستقرة على ثوابت معينة فهيبقى سهل إن أي حد يأثر فيه، يعني ممكن أصدقاء السوء يجذبوه ليهم ويخلوه يعمل أي فعل غلط يدمر بيه حياته، على سبيل المثال إنهم يخلوه يلجأ للإدمان أو إنه يعمل أي فعل غير أخلاقي.
وعشان تظهر قدراتك في الفترة دي بشكل إيجابي مش بالشكل السلبي اللي اتكلمنا عنه. هنقولك على عناصر تمشي عليها عشان تعرف تستغل وقت فراغك اللي هتحس بيه أحسن استغلال وده عشان تقدر تكون ذاتك بشكل سليم.
ثق في نفسك
خبيرة التنمية البشرية بسمة سليم بتقولك إنك لازم في البداية تساعد نفسك على إنك تحس بكيانك وتكون واثق في نفسك 100% عشان يكون عندك حصانة نفسية تخليك متتأثرش بأي كلمة سلبية حد يقولها ليك سواء الحد ده كان صاحبك أو أهلك ولو كنت بتعاني من عدم التواصل النفسي مع أهلك متخليش ده يفقدك الثقة بنفسك.
واعرف كمان إن أي مبدع في العالم عانى من مشاكل كتير في حياته ومر بظروف صعبة كان ممكن تأثر عليه بالسلب لكنه كان واثق من نفسه وقدر يدي ضهره لكل المشاكل وحقق ذاته.
وكمان لازم تحط في دماغك إنك لازم تثبت نفسك في المرحلة دي، وتكون واقف على أرض ثابتة لأنك لو مثبتش نفسك هتعيش حالة من التوهان في حياتك.
استغلال قدراتك
وأول عنصر من عناصر استغلال وقت الفراغ هو إنك تستغل القدرات اللي عندك وتوجهها في الإتجاه الصحيح، زي اتجاه رياضي مثلا يعني لو كنت بتحب كرة القدم روح نادي الناشئين، أو اتجاه فني يعني لو كنت بتحب تغني روح أي مركز فني ونمي موهبتك وهكذا.
واستغلال قدراتك ده هيخليك تنشط طاقتك وتحس بذاتك، وتطرد أي فكرة سلبية بتدور في دماغك. وكمان هتبص لحياتك بنظرة إيجابية وهيكون عندك شغف إنك تجيب درجة الإمتياز دايمًا في الحاجة اللي بتعملها.
اقرأ وثقف نفسك
اقرأ كتب وروايات لأنك كل ما بتقرى كل ما بتوسع مداركك وبيكون عندك أمل إنك هتوصل للمكانة اللي وصل ليها طه حسين مثلًا. وكل ما بتكون قادر على إنك تحل مشاكلك بنفسك وده من كتر الخبرة اللي كونتها من تجارب الأشخاص اللي قريت عنهم واللي قدروا يحلوا مشاكلهم وميخلوش العقبات تقف قدامهم.
وطبعًا قدرتك على إنك تعرف تحل المشاكل مش هيخليك تعلق مشاكلك على شماعة الآخرين وتقول دايمًا إن هما السبب، لأ ده إنت اللي هتحل مشاكلك بنفسك.
أفلام تحفيزية
اتفرج على أفلام تحفيزية كتيرة، لأنها هتعلمك إنك تخلي دايمًا عندك أمل مهما مريت بظروف صعبة.
وخبيرة التنمية البشرية بسمة سليم بتقولك إنك تعتبر كل يوم بيعدي عليك هو منحة بيديها ربنا ليك وعليك إنك تكون قد ثقته فيك ومتخليش اليوم يمر عليك بدون ما تحقق فيه حاجة ولو حصل إنك حاولت ومحققتش خلي عندك أمل في ربنا إنه هيحقق ليك اللي أنت عايزه مادام بتسعى إنك تطور من نفسك.
أنشطة إجتماعية
شارك في أي أنشطة إجتماعية لأن ده بيخليك تندمج مع الناس وتتعرف عليهم وتاخد منهم خبرة من خلال تجاربهم في الحياة. وكمان النشاط الإجتماعي بيخليك تحس بالمسؤولية تجاه الحاجة اللي بتعملها داخل النشاط أو تجاه الحياة بشكل عام. وخبيرة التنمية البشرية بتأكدلك إن كل ما كنت شخص مسؤول، وواثق من نفسك وعارف أنت عايز إيه، كل ماعديت فترة «تحت 18» بإمتياز مع مرتبة الشرف.
للمراهقين.. اصبر عالحب دلوقتي لسة شوية
