قول لحبيبتك شعر.. متخفش الكلام ده هيظبط معاك
لو عايز تقول لحبيبتك شعر يوصلها كل اللي انت حاسس بيه، هتلاقي في الموضوع ده ترشيحاتنا من الدواوين الشعرية والقصائد اللي هتظبط معاك وكتبها لمجموعة من الشعراء المتميزين.
نزار قباني
نزار قباني من أشهر الشعراء اللي كتبوا قصائد رومانسية تغنى بيها مجموعة من المطربين زي كاظم الساهر، وماجدة الرومي، وعبد الحليم الحافظ. ومن أشهر قصائده «زيديني عشقًا» اللي غنى كلماتها كاظم الساهر.
ديوان «أحبك أحبك والبقية تأتي» اللي صدر سنة 1993 من الدواوين الرومانسية اللي عبر فيها «نزار» بكلماته الشعرية المتميزة عن حبه لحبيبته اللي بيقولها فيه.
حديثك سجادة فارسية
وعيناك عصفورتان دمشقيتان
تطيران بين الجدار وبين الجدار
وقلبي يسافر مثل الحمامة فوق مياه يديك
ويأخذ قيلولة تحت ظل السوار
وإني أحبك.
ولو عايز تقرأ الديوان كامل من هنا.
8 صفات تبعد النساء عنك
محمود درويش
الشاعر الفلسطيني المعروف عنه إنه شاعر المقاومة اللي عبر في قصائده عن القضية الفلسطينية، لكن بجانب ده قدم مجموعة من القصائد الرومانسية اللي بيعبر فيها عن الحب، ومن أشهر قصائده: ريتا، وفرحًا بشيء ما، ودرس من كاما سوطرا، وكمقهى صغير هو الحب، ويطير الحمام يحط الحمام اللي بيقول فيها.
أنا وحبيبي صوتان في شفة واحدة
أنا لحبيبي أنا وحبيبي لنجمته الشاردة
وندخل في الحلم، لكنه يتباطأ كي لا نراه
وحين ينام حبيبي أصحو لكي أحرس الحلم مما يراه
أحمد رامي
«شاعر الشباب» أو«الشاعر العاشق» دي الألقاب اللي لقبوها للشاعر أحمد رامي وده من كتر ما أشعاره كانت مليانة بمشاعر الحب الجياشة، و«رامي» طبعًا زي ما انتوا عارفين كان بيحب أم كلثوم وكتب ليها مجموعة من القصائد اللي كان بيستمتع لما بيسمعها منها وبيعيش في حالة من الرومانسية وكأنها بتغنيها ليه.
أحمد شوقي
أمير الشعراء اللي يعتبر أشهر شعراء العربية في العصر الحديث قدم مجموعة من القصائد اللي اتكلمت في مواضيع مختلفة منها السياسية اللي كانت سبب في نفيه للأندلس والدينية في مدح الرسول (ص) والعاطفية.
وتعتبر قصيدة «مضناك» من أشهر القصائد العاطفية لأحمد شوقي واللي غناها موسيقار الأجيال محمد عبد الوهاب، وكمان غنتها «أنغام».
صلاح جاهين
قدم جاهين مجموعة من الرباعيات المتميزة اللي من شدة تميزها اتباع منها في أيام قليلة أكتر من 125 ألف نسخة وكانت ما بين السياسية والإجتماعية وكمان العاطفية زي:
أنا اللي بالأمر المحال اغتوى
شفت القمر نطيت لفوق في الهوى
طولته مطولتوش ايه أنا يهمني وليه
ما دام بالنشوة قلبي ارتوى
عجبي!!
الرباعية تقدروا تسمعوها بصوت جاهين في الفيديو ده.
