«المجنون» و4 تانيين.. أفلام كوميدية مشوفتهاش قبل كده
فيه أفلام كوميدية حفظناها عن ظهر قلب، وفيه أفلام تانية مكنش ليها نصيب من الشهرة اللي خدتها الأفلام اللي احنا عارفينها، وده لأننا مشوفنهاش قبل كده. وعشان كده بنرشح ليكم في الموضوع ده بعض الأفلام الكوميدية الحلوة، اللي ممكن تكون مشوفتهاش.
صاحب العمارة
عادي إن الناس تدور على شقق وممكن تلاقي، أو متلاقيش، وفيه احتمالية أنهم يتنصب عليهم لكن اللي مش عادي إن صاحب العمارة يطلب من اللي جاي يشتري إنه يساعد في بناء العمارة :D
بس ده اللي حصل مع صاحب العمارة اللي بيستغل احتياج الشباب للشقق وبيعشمهم إنه هيديهم شقة في مقابل إنهم يساهموا في بناء العمارة لكن في الأخر بيكتشفوا إنه كان بيضحك عليهم.
الفيلم من بطولة فؤاد المهندس، ويونس شلبي، وتحية كاريوكا، ومن تأليف أحمد رجب، وإخراج إبراهيم الشقنقيري.
البرنس
يمكن الفيلم ده مش متصنف إنه كوميدي لأنه بيمر بأحداث درامية شوية، لكن في إطار الحبكة بتاعته، هتلاقي أحداث كوميدية برضه واللي تعتبر الأساس في الفيلم. والأحداث الكوميدية دي بتدور حول تنكر البرنس اللي بيقوم بدوره أحمد زكي في شخصيات مختلفة عشان يقدر يقتل أفراد عيلته ويورثهم وياخد لقب «البرنس».
الفيلم من بطولة حسين فهمي، وتوفيق الدقن، ومريم فخر الدين، ومن تأليف وجيه نجيب ومساعد المخرج الأول شريف عرفة والإخراج لفاضل صالح.
ليها العجب.. حكايات المخرجين في الظهور أمام الكاميرا
التعلب والعنب
أول ما بنتخرج بتبدأ رحلتنا في التدوير على الشغل، والتدوير ده بنعيش من خلاله شوية مواقف كوميدية قد كده. والمواقف دي هنعيشها مع «محسن العصفوري» اللي بيقوم بدوره يونس شلبي، واللي «نجوى» خطيبته قالتله بعد ما اتخرج إنه يبدأ يدور على شغل عشان يقدروا يتجوزوا، لكن «محسن» بيفشل في كل وظيفة بيشتغل فيها بس يا ترى هيعمل أيه في الأخر؟ ده بقى اللي هتعرفوه لما تشوفوا الفيلم.
الفيلم من بطولة فؤاد المهندس، وآثار الحكيم، ويونس شلبي، ومن تأليف وحيد حامد، ومساعد المخرج الأول عماد عبد العظيم، والإخراج لمحمد عبد العزيز.
المجنون
قيس وليلى، وروميو وجوليت، وعنتر وعبلة، كل قصص الحب دي كوم وقصة «المجنون» كوم تاني:D والمجنون هنا هو «محسن» اللي بيحب «داليا» حب مش طبيعي لدرجة إنهم وهما في البيت بيتصلوا يقولوا لبعض كلام حب. ويوم ما «داليا» صوباعها اتعور تعويرة صغيرة «محسن» صحى الدكتور من النجمة عشان يكشف عليها.
الجيران بقى لما عرفو اللي بيحصل ده قرروا يدخلوا «محسن» مستشفى المجانين لأن علاقة حبهم فتحت عنين مرات كل واحد فيهم على إن نفسها جوزها يعاملها زي ما «محسن» بيعامل «داليا».
الفيلم من بطولة إسعاد يونس، وحسين الشربيني، والمنتصر بالله، وحيد سيف، وأبو بكر عزت، ومن تأليف عاطف بشاي وإخراج، إبراهيم الشقنقيري.
خلف أسوار الجامعة
«رمزي» اللي بيقوم بدوره جميل راتب، هو أستاذ جامعي كان بيدرس في جامعة في لندن، ورجع يدرس أدب إنجليزي في مصر بعد ما خد الدكتوراة من بلاد برا، بس للأسف معرفش يتفاهم مع الطلبة المتمثلين في سعيد صالح، ويونس شلبي، وصلاح السعدني، وإبراهيم الشرقاوي.
وبيحصل بينه وبينهم عدة مواقف كوميدية، وعلى الجانب الآخر اتقبض على الطلبة بسبب اتهامهم بجريمة قتل لكن في الأخر بيتم تبرأتهم منها وبيغير الدكتور «رمزي» طريقة تدريسه ومعاملته للطلبة. الفيلم من تأليف ضحى النجدي، وإخراج نجدي حافظ.
