ليها العجب.. حكايات المخرجين في الظهور أمام الكاميرا
يوسف شاهين، محمد خان، خيري بشارة، سمير سيف وغيرهم من المخرجين ظهروا في أفلام كتيرة، منهم اللي هو نفسه أخرجها، وفي اللي مثل في أفلام مخرج غيره. بس يا ترى أيه القصة وراء تمثيلهم في الأفلام ديه؟ تعالوا نشوف في التقرير ده من «شبابيك».
محمد خان.. لعبة تمثيلية لذيذة
«عاوز ألعب دور شرير كدة زي زكي رستم» جملة قالها «خان» وهو فطسان على روحه من الضحك :D لما كان في حواره مع منى الشاذلي في برنامج «معكم».
«خان» كان نفسه إنه يلعب دور واحد شرير كدة زي زكي رستم ويقول بنبرة صوته «بقولك أيه» بس ماحدش كان بيجيبه، وأدواره اللي عملها كانت ما بين إنه طالع كمخرج إعلانات في فيلم «واحدة بواحدة» ومخرج سينما في فيلم «ملك وكتابة»، وأب في فيلم «بيبو وبشير»، ووزير في مسلسل «امبراطورية مين».
وكل دور من الأدوار دي «خان» كان بيحب يعملها لأنه بيعتبرها لعبة تمثيلية لذيذة حابب إنه يشاركها مع أصحابه يعني مثلًا شارك بالتمثيل في فيلم «العوامة 70» لأن خيري بشارة مخرج الفيلم كان صاحبه ولما عرض عليه الدور وافق.
أما في فيلم «واحدة بواحدة» اللي أخرجه نادر جلال كان «نادر» محتاج كومبارس يشتغلوا معاه من غير فلوس فطلب من «خان» وخيري بشارة إنهم يمثلوا معاه ووافقوا وظهر «خان» بدور مخرج إعلانات زي ما قولنا أما «بشارة» فظهر بدور مصور.
وبرغم الأدوار المختلفة اللي عملها «خان» عمره ما راح من على باله إنه كان نفسه يعمل دور شرير كده زي زكي رستم وكان متغاظ إن محدش بيجيبه :D
سمير سيف.. إنقاذ للموقف
الساعة 3 بالليل كان مفروض المخرج سمير سيف يصور أول مشهد في فيلم «معالي الوزير»، وملقاش حد يمثل المشهد وكمان كان كل مساعدين الإخراج ظهروا في مشاهد تانية فإضطر هو إنه يمثل المشهد إنقاذًا للموقف لأنه مكنش ينفع يأجل التصوير لحد ما يلاقي ممثل.
عجبتني الصورة
ولما «سيف» كان بيخرج فيلم «غريب في بيتي» صوروا مدير التصوير محسن نصر وهو واقف على الكاميرا ولما شافها سمير عجبته فحطها جوا الفيلم.
الشتيمة بالأم جت منين؟.. حكاية الأنوثة في مصر من الفخر للإهانة
خالد يوسف.. ظروف شاهين الصحية
المخرج يوسف شاهين كان مفروض هيعمل دور في فيلم «جواز بقرار جمهوري» اللي كان بيخرجه خالد يوسف بس قبل التصوير بيومين تعب جدًا ومكنش ينفع إنه يعمل الدور فإنقاذًا للموقف مثل الدور خالد يوسف. ويوسف ظهر في أفلام تانية من اخراجه برضه زي فيلم «خيانة مشروعة»، و«ويجا».
مجدي أحمد علي.. المخرج عايز ممثل غير تقليدي
شارك مجدي أحمد علي في التمثيل بأدوار مساحتها صغيرة في فيلم «حرب الفراولة» للمخرج خيري بشارة وفيلم «عودة مواطن» للمخرج محمد خان، وفيلم «حكايات الغريب» من اخراج انعام محمد علي. وكان المخرج عايز اللي يعمل الدور ده يكون ممثل غير تقليدي مش بيمثل بنمطية فبيستعين بأصحابه اللي بيصادف إنه بيلاقيهم موجودين وموافقين إنهم يعملوا الدور، وده اللي حصل مع «مجدي» اللي شارك في أفلام أصحابه من المخرجين.
خيري بشارة.. تعويض عن حلم
«بشارة» كان نفسه من زمان إنه يمثل قبل ما يدرس الإخراج لكنه اكتشف مع الوقت إنه معندوش موهبة التمثيل وعشان هو بيحب التمثيل قرر إنه يفرغ حبه ليه في إطار من الأدوار الصغيرة اللي كان أصحابه بيطلبوا منه إنه يعملها زي دوره في فيلم «واحدة بواحدة» اللي قام فيه بدور مصور، وفي فيلم «زوجة رجل مهم» لما كان طالع متجوز زيزي مصطفى.
يوسف شاهين.. التعبير عن رأيه الخاص
زي ما انتوا عارفين إن «شاهين» ظهر في أفلام كتيرة ليه زي فيلم «إسكندرية كمان وكمان»، و«اليوم السادس»، و«فجر يوم جديد»، و«باب الحديد»، وده لأنه بيشوف إن من حقه يعبر عن رأيه الخاص كفنان سواء عن طريق الإخراج أو التمثيل.
و«شاهين» مش بس مثل في الأفلام اللي كان بيخرجها لأ ده كمان مثل في أفلام من إخراج مخرجين آخرين زي فيلم «اسماعيل يس في الطيران»، وده انطلاقًا من نفس فكرة التعبير عن رأيه كفنان.
خطيبك ابن أمه ولا لأ؟.. اختبريه قبل ما تتجوزيه
سعيد حامد..تأريخ عمله الفني
«الحب في التلاجة»، «همام في امستردام»، «صعيدي في الجامعة الأمريكية»، الأفلام دي أخرجها سعيد حامد وفي نفس الوقت ظهر فيها بيمر من قدام الممثل. وكان بيعتبر ظهوره ده بمثابة تأريخ لعمله الفني.
التمثيل في البروفة ضروري
وعن تجربة تمثيل المخرج المسرحي محمد جبر في عرض البروفة اللي أخرجه برضه بيقول "العرض كان بيدور حوالين بروفات مسرحية 1980 وانت طالع اللي أخرجتها فكان ضروري اني أكون بمثل جوا الفرقة اللي سبق وقامت بتمثيل العرض وأقوم بدور المخرج لأن لو كان فيه مخرج تاني مثل الدور الجمهور مش هيصدقه".
ظروف الممثلين
ولما جبر مثل في بعض ليالي عرض مسرحية "1980 وانت طالع" اللي أخرجها برضه كان بسبب ان فيه ممثل عنده ظروف مش هتخليه يعرض فكان بيمثل هو مكانه.
المخرج عنده موهبة التمثيل
وبيشوف "جبر" أن المخرج لو هيمثل لازم يكون عنده موهبة التمثيل عشان الجمهور يقدر يصدقه. ويحس أنه محطوط في المكان المظبوط اللي مدي لتمثيله قوة مش مجرد انه بيستغل فكرة انه مخرج العمل.
