ماذا تعرف عن الطالب محمود عبد العزيز الذي «دهبز» الفن؟
«رأفت الهجان، الشيخ حسني، مزجانجي، أبو كرتونة»، وغيرها من الأدوار اللي متعنا بيها الفنان محمود عبدالعزيز، على مدار تاريخه..
بوادر التميز الفني لـ«الساحر» كانت باينه من أول ما دخل الجامعة، وقبل ما يبقى الفنان المشهور اللي كل الناس بتستنى أعماله. في التقرير ده المخرج محمد فاضل، اللي كان معاه في كلية زراعة جامعة الإسكندرية، هيحكيلنا عن الطالب محمود عبد العزيز، اللي خلى فريق الجامعة يديله «سوكسيه» على تمثيله المتمكن.
المخرج محمد فاضل بيقول لـ"شبابيك" إن "محمود كان بيدرس في مدرسة الورديان الثانوية، ولما نجح دخل كلية زراعة جامعة الإسكندرية ولما كان في سنة أولى أنا كنت في البكالوريوس وكنت مخرج مسرحي".
مشهد من فوق الجسر
وبيكمل فاضل: لما جيت أخرج مسرحية "مشهد من فوق الجسر" للمخرج الأمريكي أرثر ميلر شوفت في محمود الممثل اللي هيقدر يجسد دور البطولة في المسرحية واختارته للتمثيل وده كان يعتبر أول عمل يمثله.
من بينهم محمود عبدالعزيز.. هؤلاء الفنانون تخرجوا من كلية الزراعة
قدرة على التشخيص
وأثبت "الساحر" من خلال دوره في المسرحية بحسب ما بيقول "فاضل" إنه عنده قدرة على تقمص الشخصية بكل تفاصيلها وده اللي شوفناه على مدار تاريخه من خلال الأدوار المتنوعة اللي قدمها نذكر منها على سبيل المثال لا الحصر (الشيخ حسني، زرزور، مزاجنجي، رأفت الهجان، أبو كرتونة).
القبول
وبجانب قدرته على تقمص الشخصية أثبت محمود عبد العزيز خلال الجامعة كمان إن "عنده درجة كبيرة من القبول عند الجمهور.. القبول اللي خلى الناس كلها تحبه وتفضل فاكرة كل تفاصيل الشخصيات اللي قدمها ومش بس فاكرها لأ ديه ممكن تقولها في الحياة زي ما كنا بنغني (الكيمي كيمي كا) بطريقته في فيلم الكيف".
من محمد فاضل لنور الدمرداش
وموهبة محمود عبد العزيز التمثيلية اللي أظهرها في مسرحية "مشهد من فوق الجسر" اللي أخرجها محمد فاضل خلت المخرج نور الدمرداش ياخده يمثل في الفرقة المسرحية بتاعته في الجامعة.
نجم مسرح الجامعة
وبيقول المخرج محمد فاضل "أصبح محمود نجم مسرح الجامعة لحد ما اتخرج وراح القاهرة اللي فيها اشتغل في إدارة النحل بوزارة الزراعة على ما اذكر وكمان كان بيشتغل في التليفزيون".
من الوزارة لطريق الفن
لكن محمود ساب الوزارة واتجه لطريق الفن اللي قدم فيه أعمال لاحصر له وفي كل عمل كان بيثبت انه الساحر اللي يقدر يسحرك بدوره ويخليك في حالة حب فنية لا مثيل لها.
لماذا يحبون «ساحر السينما المصرية» محمود عبدالعزيز؟
يذكر أن من أشهر الإفيهات التي اشتهر بها الساحر «الشكرمون طاخ في الترالوللي» و«يا بتاع الكيميا يا متركب» و«بحبك يا ستاموني.. مهما الناس لاموني» و«ده أنا بدهبزه وأدهرزه عشان يبرعش ويحنكش ويبقى آخر طعطعة» و«إديني في الهايف وأنا أحبك يا فننانس».
