خليكي شيك بالحجاب.. دليلك للموضة وإزاي تلاقي لبسك بسهولة
بعض المحجبات بيلاقوا صعوبة في اختيار اللبس اللي على مزاجهم لأن المحلات ساعات بتقيد الواحد، ومش بتدي اختيارات متعددة ليه. وحتى بعض البنات اللي مش محجبين شايفين إنهم لو اتحجبوا هيلاقوا صعوبة في إنهم يلبسوا لبس حلو على مزاجهم.
بس هل فعلًا ده صح؟ ولا موضوع أني ألاقي لبس سهل؟ ده اللي هنعرفه من خلال رأي صاحبة صفحة Aalaa designs ومصممة الأزياء آلاء الشناوي، واللي بتقدم ليكي مجموعة من النصايح.
اللبس متاح
بتشوف «آلاء» إن لبس المحجبات متاح دلوقت في المحلات مش زي الأول، وده عشان طلب البنات زاد عليها لأن لما البنت بتروح ومعاها صورة فستان مثلُا عايزاه وصاحب المحل بيكون مش عنده الفستان ده بيطلب من المصنع اللي بيفصل ليه اللبس إنه يعملوا وبالتالي المصنع بيجيب ليه اللبس.
فبقت المحلات عاملة حساب لبس المحجبات عشان متخسرش زباين وفي نفس الوقت متخسرش فلوس وتكون حركة البيع والشرا شغالة عندها.
عادات تضر شعرك في ارتداء الحجاب.. البسي الطرحة صح
اللبس غالي
وبتشوف «آلاء» إن الصعوبة بتكون في غلاء الأسعار، وتوضح «نقدر نقول إن الصعوبة هنا بتكون في إن بعض لبس المحجبات سعره أغلى من لبس غير المحجبة فبالتالي مش بيكون في متناول ميزانية الجميع».
وقت الخصومات
وبتنصحك «آلاء» عشان تقدري تجيبي لبس في متناول الميزانية اللي أنتي عايزاها إنك تتابعي المحلات وقت الخصومات زي محلات «ماكس»، وH&M، و«بريشكا»، لأنهم بيعملوا خصم كبير على اللبس بتاعهم اللي بيضم جيبات، وفساتين، وكارديجان شيك تناسبك كمحجبة وكمان ممكن تتابعيهم في غير وقت الخصومات وهتلاقي عندهم الملابس بأسعار مناسبة.
وحتى المحلات التانية اللي مش برندات زي اللي قولنا عليهم تقدري تلاقي فيهم الحاجة اللي أنتي عايزاها بسعر مناسب زي مثلًا فروع محل تكبير أو أي محل تاني.
لبس بشكل مختلف
واللبس اللي أنتي اشترتيه تقدري أنك تطقميه عليكي بشكل مختلف يعني لو جيبتي كارديجان كات ممكن تلبسي تحتيه بلوزة بكم، ولو لقيتي سويت شيرت قصير عجبك جيبيه والبسيه على جيبة واسعة عندك. وبكدة هيبقى بالمتاح اللي عندك تقدري تعملي طقم حلو ومختلف.
وده عشان لو ملقيتيش اللي على مزاجك تقدري أنك تجيبي المتاح، وتطقميه على حاجة تانية ويطلع الطقم بشكل مختلف يعني لو ملقيتيش كارديجان بكم تقدري تجيبي كارديجان كات وتطقميه على أي حاجة عندك وهكذا. وكمان تقدري أنك تدخلي في لبسك البنطلونات، يعني مش شرط أنك تلبسي الجيبات بس.
اطلقي موهبتك.. الحجاب ليس عائقا
وبتقترح عليكي «آلاء» أنك تلبسي البنطلونات الواسعة الطويلة اللي بتبتدي من نص الجسم كده وهي شبيهة لبنطلونات أمهاتنا اللي بيلبسوها دلوقت على الجواكيت يعني ممكن تلاقيها في المحلات اللي بتبيع الملابس الحريمي.
وهتبقى شيك معاكي وفي نفس الوقت هتقدري تلبسي عليها كارديجان طويل تحتيه شيميز مثلًا وبكده تكوني عاملتي طقم حلو برضه.
صفحات لبس أونلاين
وبجانب المحلات فيه برضه صفحات أونلاين تقدري تجيبي منها اللبس بأسعار مناسبة يعني لو عايزة تجيبي جيبة عندك صفحات زي skirt factory، The great skirt وديه بتقترحها عليكي «آلاء» لأنك هتلاقي فيها الجيبة سعرها مناسب وألوانها وخامتها مختلفة.
وكمان فيه صفحات بتقدملك تشكيلة مختلفة من اللبس زي صفحة Aalaa designs، وفيه صفحة Prude style اللي ليها محل برضه فيه اللبس اللي بتعرضه على صفحتها وتقدري تعرفي العنوان من خلال اللينك هنا، وصفحة D&R fashion design، وصفحة Ajmal fashion اللي ليها محل موجود في جنينة مول الدور الأرضي ومن هنا تقدري تتفرجي على اللبس اللي عليها.
وفيه برضه صفحة Nk-abaya&modest dresses وليها محل موجود في مدينة نصر والمعادي.
التفصيل
ولو مش عايزة تشتري سواء من المحلات أو الصفحات تقدري تفصلي اللي أنتي عايزاه من أي ترزي أنتي تعرفيه اللي هيقدر يعمل ليكي البنطلون الواسع اللي اتكلمنا عنه فوق بالألوان والمقاسات اللي حباها وده في حالة أنك ملقيتهوش. وبكده نقدر نقول إن مفيش مشكلة في اللبس خالص، وإنك هتلاقي اللبس اللي على مزاجك :)
