اتعلمي كروشية.. شياكة ومكسب ودفا في ورش وقنوات يوتيوب
لو نفسك تتعلمي كروشيه عشان تعملي كل حاجة نفسك فيها سواء بقى كوفية على ذوقك، أو شال، أو شراب شيك تقعدي بيه في البيت، هنقولك في الموضوع ده من «شبابيك» على وسايل مختلفة تتعلمي منها سواء ورش، أو قنوات يوتيوب، أو صفحات فيس.
قنوات يوتيوب
- Crochet Café
هي قناة موجودة على يوتيوب بتعلمك الكروشيه خطوة بخطوة وبشرح مفصل، وبتعلمك كمان إزاي تعملي تصاميم مختلفة منه، وده من خلال مجموعة من الفيديوهات اللي منها هتعرفي إزاي تعملي شال، أو شنطة، أو كاب شتوي، أو طاقية وغيرها من الحاجات. ومن هنا تقدري تدخلي على القناة، ومن هنا تقدري تشوفي صفحتهم.
مطربو «الراب» وفرق الأندرجراوند.. موسيقى تتمرد على سوق الغناء
- Happyberry crochet
مصممة الكروشيه لورا أكليستون عاملة قناة أجنبية على يوتيوب مخصوصة بتقدم من خلالها مجموعة من الفيديوهات المتميزة اللي بتعلمك إزاي تعملي غرزة من الألف للياء والدروس اللي بتعملها كل يوم جمعة. ادخلي من هنا على القناة.
- سوبر ماما
موقع «سوبر ماما» بيقدم خدمة فيديوهات على اليوتيوب بتعلمك حاجات مختلفة سواء ومن الحاجات دي فيديوهات لتعليم الكروشيه، وهتتعلمي من خلالها إزاي تمسكي إبرة الكروشيه وتختاري الخيط المناسب، وكمان تعملي غرزة السلسلة، والعمود العادي، وكمان إزاي تقري رموز باترونات الكروشيه، وتعملي منها أشكال مختلفة.
ادخلي على فيديوهات «سوبر ماما» من هنا.
ورش المزيكا.. اتعلم وانبسط واطربنا في الأماكن دي
- crochet and craft with love
آلاء العشماوي بتحب المشغولات اليدوية والرسم وعشان كده قررت تتعلمهم وتنقل ليكوا خبرتها، ومن ضمن المشغولات دي الكروشيه اللي بتعلمك إزاي تكوني محترفة فيه من خلال مجموعة من الفيديوهات المختلفة. من هنا تقدري تدخلي على الفيديوهات.
- Crochet with malak mohammad
وبرضه ملك محمد عندها قناة على يوتيوب بتنزل عليها مجموعة من الفيديوهات المختلفة اللي بتخليكي تتعلمي كل حاجة أنتي عايزاها سواء ازاي تعملي بنطلون، مفرش، دبدوب وغيرها من الحاجات. زوري صفحتها من هنا.
ورش
- مشكاة
مكان عبارة عن مساحة عمل مشتركة بيتعمل فيها مجموعة من الورش المختلفة ومن ضمن الورش دي ورشة الكروشيه اللي بتتعمل على طول في المكان. وسعرها بيكون 170 جنيه للمستوى الأول وعدد مستويات الورشة هيكون 4 مستويات هتقدري من خلالها أنك توصلي للإحترافية في عمل الكروشيه.
وفي ورشة الكروشيه لما تروحي هتتعلمي الغرز الاساسية وإزاي بتدخلي لون في لون تاني وإزاي بتوسعي وتضيقي وتشتغلي في دواير، وإزاي كمان تقري أي باترون أو ديزاين بتشوفيه. المكان بيعمل كل شوية ورش وتقدري تتصلي بيه على رقم 01090267793 عشان تعرفي المواعيد وأي تفاصيل أنتي عايزاها.
ومن هنا تقدري تدخلي على صفحة «مشكاة» وتتعرفي على الورش اللي بتعملها.
نصيحة..أهم حاجة مسكت الإبرة
مصممة الكروشيه سمر غانم بتقول لـ«شبابيك» إن أهم حاجة أنك تعرفي تمسكي الإبرة صح وتعرفي كمان تعملي سلسلة لأن دي البداية في دخولك عالم الكروشيه.
تعريف الباترون
«غانم» بتقولك إن أول ما تتعلمي هيقابلك كلمة اسمها «الباترون»، وده عامل زي الخريطة كده بتعرفك هتعملي الموديل اللي عايزة تعمليه بالكروشيه إزاي وعليكي أنك تعرفي تتعلمي الغرز اللي هتعملي بيها الموديل لأن كل موديل بيتكون من مجموعة من الغرز.
فوايد للكروشيه
«غانم» بتقولك إن لتعليم الكروشيه فوايد كتيرة منها أنك هتعملي كل الحاجة اللي أنتي عايزاها على ذوقك وهطلعيها فريدة من نوعها ومختلفة عن أي منتج برا. كمان أي حاجة هاند ميد بتتباع في أي محل بتكون غالية سواء شال، أو كاب شتوي أو غيره، لكن لما تيجي أنتي تعملي حاجتك بنفسك هتوفري فلوس كتير جدًا.
وهتلاقي كمان أنك بتستغلي وقت فراغك في حاجة أنتي بتحبيها وبتطلعي أحلى شغل. وأنتي بتعملي الكروشيه هتلاقيكي بتفرغي طاقة من جواكي في كل غرزة أنتي بتعمليها.
«غانم» بتقولك كمان إن تعليم الكروشيه هيفتحلك باب رزق لو قررتي في يوم أنك تعملي صفحة وتبيعي الحاجة اللي بتعمليها.
ولو أخدتي الكروشيه كإحتراف، «غانم» بتنصحك أنك توفقي بين كل حاجة بتعمليها يعني متخليش عمل الكروشيه يوقفلك باقي الحاجات اللي بتعمليها في حياتك.
وكمان خلي في شيء من الموازنة بين الحاجات اللي بتعمليها. ومن هنا تقدري تدخلي على صفحة سمر غانم وتتابعي الفيديوهات وألبومات الصور اللي بتنزلها عن تعليم الكروشيه.
