الجنيّة في مطروح.. عروض فنية ومسرح وسينما متفوتكش

«ياساكني مطروح جنيّة في بحركم الناس تيجي وتروح وأنا عاشقة حيكم»، صدقت عايدة الأيوبي لما قالت أنا عاشقة حيكم لأن فعلًا كل اللي بيروح مرسى مطروح بيعشق كل تفصيلة فيها. ولو أنت فيها وعايز تتفسح وتروح أماكن بتقدم عروض فنية تتبسط وياها تعالي أما أقولك بقى هتروح فين.

هنبدأ الأول بقصر ثقافة مرسى مطروح، وده بيقدم عروض فنية مختلفة سواء مسرحية أو فنون شعبية بجانب الورش، سواء ورش في مجال المسرح أو ورش فنون تشكيلية. وداخل القصر برضه هتلاقي فيه نادي السينما، ونادي الأدب، ومكتبة وغيرها من الأنشطة اللي تقدر تستمتع بيها سواء بالمشاركة فيها أو بالفرجة عليها وأنت جوا القصر.

وكل اللي عليك أنك تاخد لفة في كل ركن من أركانه لأن هيفوتك كتير لو فلتت منك حاجة، وهتلاقي القصر موجود في شارع الجلاء وسط المدينة. وفيه برضه بيوت ثقافية في مجموعة من المراكز، وهتلاقي فيها أنشطة وعروض فنية، ولو صادف أنك كنت قاعد في مركز منهم هيبقى سهل عليك تروح بيت الثقافة على طول وده في حالة أن قصر الثقافة هيكون بعيد عليك.

والبيوت دي موجودة في مركز «سيدي براني»، و«السلوم»، و«سيوة»، و«الضبعة»، و«سيدي عبد الرحمن». وطبعًا البيوت دي معروفة لو سألت حد عليهم هيدلك على طول. وفيه صحيح مكتبة موجودة بقرية سيدي عبد الرحمن التابعة لمركز العلمين ممكن تبقى تروح كده تقرأ أي كتاب عايزه، وبرضه ممكن تشتري وهتلاقي الكتب هناك سعرها كويس ومش هيخرم الميزانية بتاعتك.

مقدرش أنسى برضه قصر ثقافة الطفل اللي موجود في ‎شارع الفيروز جنب فندق الشلال وده حلاوته في أنك لو معاك أطفال تقدر أنك توديهم القصر يتبسطوا بالعروض والأنشطة اللي بيقدمها. وفيه مسرح كمان  اسمه «مسرح الشاطئ» وده موجود على كورنيش مرسى مطروح وبيقدم كل يوم عروض ببلاش سواء فنون شعبية أو موسيقى عربية.

وعندك كمان النادي الاجتماعي وهتلاقي فيه عروض فنية مختلفة بتتعرض مرة في الأسبوع أو مرتين، والنادي لو سألت عليه هتوصل وفيه علامة مميزة هتدلك عليه وهي أنك هتلاقيه موجود جنب سوبر ماركت فتح الله. ومتقلقش فيه سينما برضه اسمها «سينما السلام» تبع القوات المسلحة موجودة وسط المدينة جنب فندق السلام للقوات المسلحة.

ولو نفسك بقى تطلع روح الطفل اللي جواك هتلاقي عندك ملاهي منتشرة على الكورنيش وفيه برضه سيرك تقدر تروحوا وتستمتع بفقراته وهتلاقيه موجود في مكانين الأول جمب محطة السكة الحديد عند مدخل مدينة مطروح والتاني موجود في نهاية الكورنيش جنب فندق المشير أحمد بدوي. أتمنى تتبسط بجولتك في مطروح وتغني زي ما غنت عايدة الأيوبي «ياساكني مطروح جنيّة في بحركم الناس تيجي وتروح وأنا عاشقة حيكم».