فاكر «طلّقها يا أبو العلا»؟.. تعرّف على أبطال الأدوار الثانوية الجادة في السينما

الأدوار الجادة في السينما المصرية زمان قدر يتقمصها بإحترافية مجموعة من الممثلين، وكلامي هنا عن الممثل اللي كان بيطلع بدور ثانوي وأغلبنا ممكن يكون عارفه شكلًا لكن ميعرفش عنه حاجة. وعشان كدة هنتكلم عنهم النهاردة بحيث نعرفك عليهم أكتر.  

أحمد لوكسر

فاكرين الراجل اللي شنقه عادل إمام في فيلم «سلام يا صاحبي» عشان كان السبب في قتل صاحب عمره سعيد صالح؟ أهو الراجل ده اسمه أحمد لوكسر. بدأ «لوكسر» موهبته التمثيلية من خلال المسرح المدرسي وبعدين دخل معهد التمثيل، وأول مرة يدخل عالم السينما كان في فيلم «الزوجة رقم 13» وبعدين انطلق في تجسيد الأدوار المختلفة في أفلام متعددة زي دور المخرج في فيلم «بين السما والأرض»، ودور «رينود دي شاتيون»  في فيلم «الناصر صلاح الدين».

حسن البارودي

كان بيحلل كل حاجة للعمدة في فيلم «الزوجة التانية» عشان ينول رضاه وكرمه. العمدة يقولوا عايز أتجوز البت فاطمة المتجوزة، يروح على طول مطلقها ومجوزها ليه وغيرها وغيرها من الحاجات. واشتهر بجملة «طلّقها يا أبو العلا».

والحقيقة قدر أنه يتقن الدور جدًا وهو حسن البارودي. اللي بدأ التمثيل من خلال المسرح مع فرقة يوسف وهبي، ورمسيس نجيب وغيرها من الفرق وبعد كدة اتجه للتمثيل في السينما وقدم من خلالها أدوا تعتبر علامات زي دور «الشيخ عتمان» اللي قولنالكم عليه دلوقت.

أحمد الجزيري

تحس وأنت بتتفرج عليه أنه بيمثل معاناة المواطن المصري المطحون وده ظهر قوي في فيلم «أنا لا أكذب ولكني أتجمل» اللي كان طالع فيه والد أحمد زكي.

أحمد الجزيري ممثل دخل معهد التمثيل وبعدين انطلق في تجسيد الأدوار المختلفة سواء في السينما أو المسرح. ومن المسرحيات اللي شارك فيها «عيلة الدوغري»، و«سكة السلامة».

أما في السينما فشارك في أفلام كان ليه فيها بصمة متميزة زي فيلم «دمي ودموعي وابتسامتي» وفيلم «أنا لا أكذب ولكني أتجمل» اللي أخد عنه جايزة أحسن ممثل، وكمان اشترك في الأعمال الدرامية من خلال مسلسل الشهد والدموع.

حمدي يوسف

أول ما تشوفوا تحس كدة بهيبة وكأنه وزير، وده فعلًا الدور اللي كان بيليق عليه في الأدوار اللي قدمها وكأنه متفصل على مقاسه. وكلامي عن حمدي يوسف اللي بدأ تمثيل من الستينات خلال المسرح والسينما والتليفزيون. والأدوار اللي قدمها كانت بتدور حوالين الشخص اللي ليه هيبة كدة زي دور الدكتور، وضابط الشرطة، والوزير، وده كان في أفلام «طيور الظلام»، و«مهمة في تل أبيب»، و«كراكون في الشارع».

إبراهيم الشامي

ملامحه كانت دايمًا حزينة، يمكن مش فاكرة امتى شوفتوا بيضحك بس الملامح دي هي اللي خلته يجيد تمثيل أدوار كتيرة. بداية ابراهيم الشامي في التمثيل كانت من خلال المسرح الديني وبعد كدة راح المسرح القومي وقدم هناك مجموعة من المسرحيات ومن المسرح راح للسينما وكان أول عمل يمثل فيه هو فيلم «آمال» ومن بعد الفيلم ده مثل أدوار كتيرة في أعمال مختلفة منها فيلم «إعدام ميت»، ومسلسل «صابر يا عم صابر».