6  حاجات في عيد الحب.. تجنبها

عيد الحب بيكون  كارثة لبعض الرجالة المتمسكين بشرقيتهم خصوصا إن يوم 14 فبراير ده للحبية في العالم كله بس.

صعوبته مش في قيمة الهدية أو مكان العزومة، أنت مش محتاج للتكاليف العالية وخلي عيدك بسيط زي حبك.

لكن في حاجات «شبابيك» هتقولك عليها هتقلب عيشتك لو نسيتها أو عملت حاجة منها:

1- متنساش:

 أحيانا إنك تفتكر اليوم ده بكلمة كل سنة وأنت/أنتي طيب/ة بتكون أهم بكتير من عزومة في مكان رومانسي أو هدية غالية، هيفرق كتير جدا مع الطرف التاني لأن الموضوع بالنسبة له مش عيد وبلاليين وورد وكلام حلو وخلاص، الحكاية إنك افتكرته .

2- متوفرش: 

افتكرت العيد وبتدور على الهدية، وقتها انسى شخصيتك وافتكر شخصيتها وعاملها على أنها أنثى وبس، يعني متقولش أوفر في البيت وأريحها وشتري  غسالة جديدة أو خلاط أو أنتي تشتريله قميص أو جهاز لاب توب عشان جهازه بتاع الشغل بايظ، وتقولوا منها هدية وحاجة نستفيد بيها، ممكن اليوم ده تجيب وردة وبعدها هات اللى أنت عايزه، لكن اليوم ده متفكرش غير فيه هو وبس .

3- يومك كالعادة: 

حاول تغير في كل حاجة اليوم ده، استمرارك في شكلك وطريقة كلامك وإنك تخرج في نفس المكان اللي متعودين على الخروج فيه، وتختار نفس هدية كل مناسبة وكل سنة بحجة إنه بيحبها وأكيد هو ما بيحبش حاجة واحدة يعني!!!، هو هيحب أي حاجة تكون منك، وعيد الحب مش مناسبة وهدية، ده يوم لازم يكون مختلف بكل ما فيه، ضيف جديد لحياتكم.

4- متلخصش في المادة: 

حلو إنك تفتكر اليوم وتقول كلام رومانسي وتجيب هدية، لكن متختصرش كل حاجة في إنك عملت وبقالك أسبوع بتفكر في الهدية ووفرت من مرتبك وروحت أكبر المحلات وجبت أغلى الهدايا، خليك بسيط وطالما عملت الحاجة خليها تكمل للنهاية ووصل الفكرة إنك عملت كده عشانه هو وبس بغض النظر عن التكاليف والمصاريف والمجهود الجبار اللي عملته، ومتقتصدش اليوم ده في المادة.

5- متزودهاش: 

جمال الحب في بساطته وأحلامه المشتركة، وركز في "المشتركة" دي، يعني متعملش حاجة بتحبها لوحدك بغض النظر عن حبيبك بيفكر إزاي وهو بيحب إيه، ومتقررش تعمل مغامرة أو مفاجأة لمجرد إنك شوفتها في فيلم أو حد صاحبك حكالك عليها، لأنها ممكن تقلب بنتيجة عكسية، خصوصا لما تعمل حاجة من غير مراعاة اللي قدامك، الخجل والخوف، كل دي حاجات لازم تاخد بالك منها.

6- متقلدش: 

أوعى تقلد حد وتدور على الأماكن اللي كل الناس بتروحها، وتشوف إيه هي هدية السنة وتجيبها، صدقني مش هتبقى بإحساسك أنت وهتكون معتادة وتقليدية، اختار حاجة منك وليك وتكون أنت عارفها وحاسسها هتلاقيها وصلت بسرعة.