في الجامعة.. «لأ مفيش الكلام ده خالص»

الجامعة هى «ليفيل الوحش» بعد«بُعبُع» الثانوية العامة، ورغم إن الإتنين مراحل تعليمية مش سهلة ومحتاجة مجهود، إلا إنهم مختلفين تماماً.

انتقالك من الدراسة الثانوية إلى الدراسة الجامعية يعتبر التطبيق العملي لجملة «إنسى يا عمرو»، لأنه لازم تنسى كل اللي عرفته في المدرسة وتبدأ من جديد كإنك لسا بتتعلم، مش هتلاقي نفس المصطلحات اللي كنت بتقولها في مدرستك، كله جديد في جديد.

يعني مثلاً مش هتلاقي مثال المدرسة المصرية العظيمة ميس «ميرفت» اللي بتدرسلك «الانجلش» في "الكيلاس"، صحيح كمان مفيش حاجة إسمها ميس أو كيلاس أصلًا» ولا "مستر"، إسمه "دكتور" و"مدرج".

كمان معندكش 7 أو 8 حصص في اليوم، عندك محاضرات" هتغلط في الأول وتتلغبط و تقول لـ"دكتور" يا أستاذ وعلى "المحاضرة" حصة، بس ده في الأول بس، لأنه لو إستمر هتبقى نكتة المكان أكتر من "خلف الدهشورى خلف".

أما بالنسبة لليونيفورم بتاع مدرستك والألوان ممنوعة والشعر اللي كان بيتجاب على الجنب، لأ إنت خلاص كبرت و"مفيش الكلام ده خالص"، هتلاقي الموضوع فيه حرية بس إوعى برضه تستغلها غلط وتلبس زي صاحبنا "خلف" وتقول "إن دي أقل حاجة عندك، وإنك كده مراعي مشاعر الزملاء".

خليك طبيعي وإنسى برضه فكرتك إن الجامعة الي بتشوفها في الأفلام، عيش تجربتك الجديدة بنفسك من غير ما تخلى خيالك يقف على اللي شفته وماعيشتوش وبس.

أما وقت الـ"فُسحة" فتنساه، إسمه هنا "break" أرجوك ما تكسفناش، البريك ده بقى هتروح فيه للكافيتريا مش للـ"كانتين" ركز كده عشان ما يبقاش منظرك وحش.

بالمناسبة كمان، الجامعة مش هتخليك تروح البيت تلعب وتنام وتنسى المذاكرة، اللي فهمك كده ماعرفش يوضحلك صح، في واجبات لازم تعملها بس واجبات أو"homework" دي نقولها بينا وبين بعض وننساها بعد السطر كمان اللي هيتطلب منك في الجامعة إسمه "assignment" أو "تكليف، بحث".

في المدرسة كنت ممكن "تزوغ" و لو حد شافك تبقى مشكلة، في الكلية مش هيبقى إسمه "تزويغ" هيبقى إسمه في محاضرة فاتتك نقصت عليها عدد درجات معين وخلاص، ما تخافش محدش هيطلع يجيبك من قفاك.

في أول كل سنة بتقف في صف طويل غير طابور الصباح، صف إستلامك للكتب، الصف ده تنساه خالص، عشان في الجامعة إنت اللي هتدور على كتبك اللي هتدرسها وتشتريها بنفسك، وكمان بالمرة إنسى طابور الصباح ده خالص عشان راح زمنه.

هتلاقي واحد كده شبه الولد الرخم اللي كان بيقف على الفصل يضايقك وياخد الغياب-يمكن ما يكونش رخم أو يكون عادي- ده إسمه "المعيد" وعشان ما ينفعش تنادي لحد تقوله يا"مُعيد" عشان غريبة قوي فهتقوله يا "دكتور" برضه.

لو فاكر كده في يوم في آخر كل شهر كنت بتغيبه، يوم الإمتحان ده عارفه؟ ، في الجامعة بقى هتروحه لأنه مش هيبقى كل شهر ولازم ولى أمرك يمضي على إستلام شهادة درجتك فيه..لأ ده هيبقى في نص الترم وماسموش"إمتحان شهر" إسمه"mid term" وركز وإنت بتقولها "ميد" مش "ميت أو 100" تمام؟

نصيحة كده، بلاش تدخل بـ attitude  الولد الناصح اللي بياخد غياب الفصل وبيفتن عليهم لما يزوغوا ويغيبوا ويعمل مسائل ماتطلبتش منه في الواجب وبيكتب كل حرف ورا المستر عشان ياخد "ممتاز ونجمة"، الجامعة مكان  هتتعلم فيه حاجات أكبر من كل ده، لازم تبقى فاهم إن مرحلة المدرسة دي "حماده" والجامعة دي " حماده لما كبر و بقى عاقل".