إزاي تتعاملي مع «البجحين»؟
البجحين.. أشخاص مش بيتكسفوا وبيفرضوا نفسهم بالغصب، والواحد منهم يعمل المصيبة ويقول عليها عادي، الغلط بالنسبالة حق مكتسب.
وهنا دليل للبنات تعرف من خلاله البجحين، وإزاي تتعاملي معاهم؟
أبو دبشة
بيتعامل معاكي زي صاحبه الولد، ويتكلم بكل قلة ذوق، وتحسي أنه بيحدف طوب، من غير ما يراعي إنك بنت، ويقولك مثلا «إنتي تخينة قوي»، أو «انتي معندكيش غير الطقم ده»، ولو إنتي مرتبطة بيه مش هيخاف على زعلك وهيمشي مع بنات ويصاحبهم ويقولك عليهم!.
العافيجي
مش بيخاف من أي حاجة، أستاذ في المصايب وبالنسبالة عادي يدخلك معاه فيها، وهتحصلك مشاكل كتير بسببه، وأكتر الناس دي بتظهر في المشاريع الجماعية في الكلية، ولما تواجهيه يقولك «إذا كان عاجبك».
وش مكشوف
يتكلم عنك من وراكي مع صحابه الولاد وقدام زمايلك في الجامعة عادي، ولو سألتيه يقولك «اشمعنى أنا إللي هسكت.. كلهم بيتكلموا».
اللزقة
نوعه بسيط بس بيضايق، هي طبيعة فيه أحيانا مش بيتحكم فيها، مثلا وهو بيتكلم دايما يفضل يقرب جسمه منك فأنتي تبعدي وتخلي في مسافة بينكوا – الموقف ده مش مشكلة- بس البجاحة بقي لما يسألك بتبعدي ليه؟ خايفة مني؟ سذاجته إنه يفهم كده، بس لازم تعرّفيه أنك عايزة هوا تتنفسي.
والحل أهو
فرض الشخصية: افرضي شخصيتك من البداية مع زمايلك الشباب، اثبتي إنك شخصية قوية ومش بتخافي من حد، وإنك بتعرفي تاخدي حقك كويس.
الحدود
الحدود، خلي فيه حدود مع زمايلك في التعامل؛ يعني لو أنتي مش بتحبي التعامل بالأيد، وضحي ده من أول التعامل ولو أي حد بجح وتطاول اكسفيه أكتر من مرة لحد ما يبطل.
الصدة بالذوق، البجح دايمًا بيفتكر أن مفيش حد يقدر عليه، ولو صديته أول مرة بالذوق ومنفعش معاه صديه التانية والتالتة من غير ذوق وياريت لو كان قدام زمايله الولاد.. في إحتمال يتكسف فعلا.
التجاهل
فيه شخصيات بجحة بتتعبي معاهم، تعملي تصرفات كتير وهما في قمم جبال الثلج ومش بيحسوا بأي حاجة.. ريحي نفسك وتجاهلي الكلام والتعامل معاهم.. أنتي هترتاحي وهو هيزهق.
المقال المنشور في قسم شباك يعبر عن رأي كاتبه
