السيسي للمصريين: الدولة مش أكل وشرب بس (فيديو)
وجه رئيس الجمهورية عبدالفتاح السيسي، رسالة للمواطنين خلال افتتاحه محطة تحيا مصر متعددة الأغراض بميناء الإسكندرية، اليوم الخميس.
رسالة السيسي للمصريين
قال السيسي: «أنا بس عايز أقولكم حاجة على ميناء الإسكندرية، وأفكر الناس إننا لما كنا بنيجي نعيد ضبط الموضوعات في بلادنا، مكناش بنعمل ميناء في أرض فاضية، إحنا كنا بنعمل ميناء أهدرت حدودها وضاعت معالمها».
وأضاف: «أنا بقول للناس اللي في مصر كلها إحنا بدأنا نعمل حاجة مش في ظروف عادية خالص، وللمستثمرين انتو بتحطوا إيديكم في إيد دولة بتكافح علشان تحط نفسها على خريطة الدنيا».
وتابع رئيس الجمهورية: «علشان ميناء الإسكندرية يبقى بالمستوى ده ويبقى درة مصر احنا بنتكلم في أرقام كبيرة جدا أنفقت علشان التسوية بس».
وقال: «علشان وزير النقل يتكلم في محور لوجيستي من السخنة لإسكندرية في تفاصيل كتيرة جدا جدا، فأنا لما بكلمكم كده يا مصريين تعرفوا يعني إيه دولة.. الدولة مش أكل وشرب.. الدولة حاجة تانية خالص غير اللي احنا بنتكلم فيه».
وواصل: «خلو بالكم.. انت بتضغط على نفسك ومواردك علشان تعمل كده، لكنك محتاج تعمل ده علشان تحط نفسك على خريطة بتقول فيها إن الدنيا بتتغير وإن في محاور بتخلق ومن حق الناس كلها تتطور وتستفيد من مواقعها وقدراتها، وأنا عندي قدرات وفوائض.. ولا احنا هنقعد من غير ما نتحرك ونسيب بلدنا؟».
