خطوات الإقلاع عن التدخين.. «العزيمة أولا»
كل حاجة بنحبها وعايزين نعملها هنقدر بعزيمتنا.. بالذات لو الأمر متعلق بإنقاذ الحياة والحفاظ على الصحة.. الإقلاع عن التدخين أزمة بتواجه كتير مننا.. لكن الأمر سهل جدا لو عرفنا أضراره واتبعنا خطوات الإقلاع عنه..
أضراره
هبوط في ضغط الدم وضربات القلب ده غير القلق، والضجر، وسرطان الرئة، وقصور الدورة الدموية، وأثارة على الحمل والرضيع والجسم كله بشكل عام.
دخان السجاير بيحتوي على النكوتين ومادة (4ـ3 بنزوبيرين) المسرطنة.
دي الأضرار الصحية بس، غير بقى المصاريف والتكاليف، يعني مجموع نفقاتك على التدخين كل شهر بتساوي تقريباً مصاريف إبنك للمدرسة لمدة 3 شهور.
شوف الموضوع ده:
أضرار التدخين وانعكاساته على صحة المجتمع
حياتك
غير أسلوب حياتك القديم خالص، وحاول تقتل وقت فراغك وتملاه بحاجات تانية، إيه رايك لو تروح جيم مكان القهوة؟، خد أصحابك وروح نادي العب كورة، وممكن تقرأ كتاب أو قصة حلوة تشغل وقتك عن التدخين.
اتمشى المسافات القريبة متركبش مواصلة واقعد مع أهلك واتكلم معاهم كتير، وفكر في الفلوس اللي بتصرفها على السجاير وحط بدايل ليها، يعني اسأل نفسك أنا لو هوفر 500 جنيه في الشهر ممكن أعمل بيهم أيه؟..
الصحاب
زي ما أسلوب حياتك هيتغير، الناس المحيطين بيك لازم يتغيروا جزئيا، مش هتسيب أصحابك يعني، لكن في جلسات بتبقى كلها مدخنين وفيها أشخاص يحاولوا يقللوا دايما من عزيمتك ويبهروك بقدراتهم على شرب السجاير، أبعد عن الناس دي فترة من الوقت وحاول تدور على أشخاص مبيدخنوش وقرب منهم وشوف الفرق بين اسلوب حياتك وحياتهم.
اتحدى نفسك
هتكتشف إنك كنت عايش في وهم سيطرة التدخين عليك، وهتلاقي قوة شخصيتك وسيطرتك على شخصيتك والتحكم فيها بتديك دفعة لقدام، ده غير إنك هتزيد ثقتك في نفسك بصورة كبيرة، كل ده هتتأكد منه لما تدخل معركة الرجوع ليه تاني، لأنها أصعب من مرحلة الإقلاع نفسها.
التجربة
محمود كان مدخن من أيام الثانوية العامة، وشايف الموضوع صعب جدا، وبعد 6 سنين حصل معاه موقف معين خلاه يبطل.
بيقول "محمود" إنه كان في الجامعة ورايح يحضر ندوة عن "السرطان"، واكتشف فجأة إن ممعاهوش سجاير لأنه كان صاحي متأخر، وبدأ يدور على مكان يشتري منه لكن كان ده صعب جدا.
وهنا لف على الشباب اللي قاعد ويسألهم على سجاير وحس فعلا بإنه قليل وضعيف جدا قدامها، وقرر إنه يبطل وقتها ومشربش تاني لحد أما مر بظروف صحية راح للدكتور بسببها، ولما عرف إنه مبطل تدخين مرة واحدة قاله خليها تدريجيا عشان تعود الجسم.
محمود بيقول إن معرفة تأثيرها عليك وخطورتها وإرادتك هي اللي بتفرق في قرار زي الإقلاع عن التدخين.
