منة مدحت تكتب: القبة ولا العريس؟

«ركزي في القبة يا نجيبة».. «العريس يا نجيبة».. «القبة يا فلتة»

دا الكلام الي كانت أم نجيبة وأبوها بيقولوهولها وهي رايحة أول يوم في الجامعة في فيلم ياسمين عبد العزيز (الثلاثة يشتغلونها)

أبوها كان عايزها تركز في الكلية والدراسة، وأمها كانت عايزاها تركز في إنها تلاقي عريس، وهي مكانتش عارفة عايزة ايه اصلا، وأمها كانت بتقعد معاها تفرز ورق الطلاب اللي معاها في الكلية، وتشوف انهي العريس المناسب لبنتها، ويفضل لو يكون معاه فلوس و عربية و غني .

في مجتمعنا الشرقي، البنت بتتربي على أن حياتها كلها بتتمحور حوالين الجواز، وبالتالي لما تيجي رايحة سنة أولى جامعة هتلاقي ماما وخالتو وتيتيه وكل ستات العيلة بتقولك نصايح إزاي تلقطي العريس المناسب من الجامعة، وازاي تحاولي تهتمي بنفسك وبمظهرك وانتي رايحة الجامعة عشان لما تتخرجي تكوني اتخطبتي أو قريتي فاتحة أو أي حاجة يعني، المهم متخرجيش كدا.

الأمهات والستات دول ميعرفوش أنهم بنسبة كبيرة بيدمروا حياة البنت اللي بيخلوها تفكر أنها في النهاية زوجة وبس، وأنها مهما كانت ناجحة في شغلها أو في دراستها فدا ملهوش أي لازمة طالما متجوزتش، يعني من الأخر مفيش داعي تحلمي بشغل أو سفر أو دراسة أو استقلال أو اي حاجة من الحاجات دي عشان دي مش ليكي دي للولد بس.

مصر الأولى على مستوى العالم في حالات الطلاق، وفي إحصائية بتقول أن المجتمع المصري فيه حالة طلاق كل 6 دقايق (إحصائيات مركز معلومات دعم اتخاذ القرار التابع لمجلس الوزراء) نسبة حالات الطلاق زادت من 7%  لـ 40% في الخمسين سنة الأخيرة، دا بسبب حاجات كتير، ومنها أن الجواز بقي هدف في حد ذاته وبقي أهم إنجاز ممكن البنت أو الولد يحققوه، والأهل يكونوا مبسوطين بيه ويتباهوا بماديات ومظاهر جواز ولادهم من شقة لمهر لجهاز.

ولما البنت أو الولد يوصلو لسن معين من غير جواز يبقي في حاجة غلط ويبقو متأخرين في الارتباط و القطر فاتهم، ودا الي بيخلينا نسمع كل شويا "مش هنفرح بيكي" للبنات و" مش هتشد حيلك بقي " للولاد.

في حاجات كتير ممكن تعمليها غير أنك تدوري علي العريس المناسب في الجامعة، حاولي توسعي دايرة نشاطك، واهتمي بدراستك وبتنمية مهاراتك وهواياتك وانك تتعلمي حاجات جديدة، لأن مرحلة الجامعة مرحلة مهمة جدا في الحياة العملية، ودي أكتر فترة هيكون متوفرلك صحة ووقت ودماغ إنك تبني خبرة في أي مجال، دي حاجات مش هتفضل موجودة عندك على طول.

الارتباط مش هدف في حد ذاته، متوقفيش حياتك منتظرة فارس الأحلام الهمام اللي هيجي يحلك مشاكلك ويخلي حياتك أحسن، محدش هيخلي حياتك أحسن غيرك، الارتباط طبعا مهم ،لكن في وقته وفي التوقيت المناسب بالنسبالك مش بالنسبة لأهلك أو لصحباتك، مترضيش بأي حاجة عشان ضغط الأهل وحددي أولوياتك إذا كانت القبة ولا ... العريس.