قصص أطفال قبل النوم مكتوبة بالعامية

• نورة والمصباح العجيب

(كان يا مكان.. في يوم من الأيام كان فيه بنت حلوة اسمها نورة بتحب القصص، والحكايات اللي فيها مغامرات وأساطير، ولقت في يوم مصباح قديم في بيتها، وقالت إنها هتنظفه عشان تعلقه في أوضتها، ومرة واحدة خرج منه دخان أزرق، وظهر جني صغير، وقالها: شكرًا لأنك خلتيني حر، وأنا هحققلك أمنية نفسك فيها).

(نورة اتفاجأت من اللي حصل، بس فكرت بسرعة، وقالت: عايزة أعيش مغامرة مش ممكن تتنسي، رد عليها وقالها: هعملها زي مانتي عايزة، ولمس المصباح، ومرة واحدة لقت البنت الصغيرة نفسها في عالم سحري مليان بالعجائب.. شافت غابت سحرية وكائنات أول مرة تشوفها).

(نورة كمان شافت حصان أبيض وعنده جناحين، وقالها أنه هيكون معاها في كل مغامراتها، وركبت معاه وطاروا في السماء، واتفرجت على الأنهار والجبال وهما في طريقهم لمدينة كاملة من الذهب والماس، وبعد ما وصلوا قابلوا ملكة، وقالت لنورة أنها سمعت مغامراتها، وأنهم محتاجين مساعدتها من التنين الشرير اللي عايز يدمر المدينة).

(بكل شجاعة، نورة قالتلها أنها هتساعدهم أكيد، وفكرت بذكاء وعملت خطة عشان يواجهوا التنين، وفعلًا نجحوا أنهم ينقذوا المدينة من التنين الشرير، والملكة الطيبة شكرت البنت الحلوة، وكمان أديتها تاج ذهب).

(بعد كده الجني قال لنورة أنها لازم ترجع خلاص، ولمس المصباح تاني عشان تلاقي نفسها رجعت الأوضة بتاعتها، وكانت فرحانة أوي بالمغامرة اللي عملتها، وحكتها لعيلتها وأصحابها، واحتفظت بالمصباح عشان بقى ليه ذكرى حلوة معاها).

• الأسد والفأر

(كان يا مكان.. في يوم من الأيام الأسد ملك الغابة كان نايم، مرة واحدة طلع الفأر الصغير على ظهره وقعد يلعب، الأسد اتعصب وصحي من النوم، ومسك الفأر عشان ياكله، والفأر خاف جدًا وفضل يعتذرله عشان يسيبه، ووعده كمان أنه هينقذه في يوم لو سابه.. ضحك الأسد وقاله أنت صغير هتساعدني ازاي وأنا قوي، بس قرر إنه هيسيبه).

(بعد كام يوم، جه صيادين ومسكوا الأسد وكتفوه بالحبال، وكانوا رايحين عشان يجيبوا قفص، الفأر شاف المنظر ده وقرر إنه ينفذ وعده، وقرب من الأسد وقطع الحبل، عشان يهرب ملك الغابة من الصيادين، وبص الفأر للأسد وقاله أنا قولتلك إني هنقذك في يوم من الأيام، وندم الأسد أنه كان بيضحك على كلامه وشكره عشان أنقذه).

• سعد والطيور الجائعة

(كان يا مكان.. في يوم من الأيام كان في ولد اسمه سعد بيحب يروح الحديقة جنب البيت بعد المدرسة، عشان كلها أشجار وطيور وورد ألوانه حلوة، وقرر مرة أن يأكل الصيور، وفعلًا قعد تحت شجرة كبيرة وبدأت الطيور تتجمع حواليه، وهو فرح جدًا، بس سمع مرة وحدة صوت طير بيعيط، بص لقاه واقع على الأرض وتعبان، وقرر ياخده معاه).

(أم سعد نظفت جناح الطير، وسعد حطه في صندوق جواه قطن عشان يرتاح، وكان بياخد باله منه، وبعد كام يوم الطير اتحسن، وبدأ يحرك جناحه، وقرر الطفل الصغير أنه يرجعه الحديقة تاني، وفعلًا طار وسعد كان مبسوط أوي، وقرر أنه يروح كل يوم عشان يأكل الطيور، وكان بيفتكر اللي عمله مع الطير ويفرح).