«القلاع».. فطير من العيار الثقيل
أي حد هيروح إسكندرية لازم تجى فى باله أكلة السمك الجامد من "قدورة" أو مشويات "بلبع".. لكن مين يعرف الحج أحمد القلاع..لا استنى.. ده معرووووف جداا.
المحل تأسس 1965؛ «فطير القلاع» لحد دلوقتى شغال، وشخصيًا أول مرة أكل من عنده كان من 20 سنة ولسة مكملة.. طعمه جامد جداً، لو أكلته وانت مغمض عينيك مش هتعرف بتاكل إيه. بيتزا ولا كوردون بلو.
الريحة
هتستغربوا أنا ليه بدأت بالريحة؛ لأنها حلوة جداا هتشم ريحة السدق الإسكندرانى والبسطرمة القديمة والجبنة التركي إللي مليانة فلف أسود معتق.
هتشمها من أول شارع البحر لحد ما توصل لـ شارع بورسعيد فى كابشيزار؛ هتلاقي محل صغير محندق مساحتة مش أكتر من 100 متر وممكن أقل؛ يادوبك أخد الفرن والفططري، وواحد تاني يسلمك طلبك.
الفرشة
يعنى العجينة الخفيفة، إلي بتقرمش من فوق ومن تحت ..تاكلها مش عارف هيا محمرة ولا مشوية من كتر ما طعمها محمر مظبوط ولو كلتها حاف طعمه فيها الملح والبهارات وتحس بيها بطعم الشوي..كأنك بتاكل كباب.
الحشو
بص بقي إحنا لسه هنعمل منيو، مش محتاجين، عندنا فطير بالسدق والبسطرمة سادة وفي منهم بالجبنة والحلو موجود بالسكر والكاستر ولو عايز تشكيلة ماشي بس الأحلي تاخد كل طعم لوحدة؛ يعنى فطيرة بسطرمة وفطيرة للسدق.
السدق، بالإسكندراني لو إنت قاهري قوله بالسجق هيفهمك عادي؛ السدق الإسكندراني يعني اتصل بالمطافي قبل ما تاخد قطمة واحدة؛ الفلفل الأخضر حراق جداا ده غير الشطة إللي هتتحط على الجبنة وهيا بتسيح، مستوي كويس جدا لا بيفرول ولا ناشف مظبوط بالسنتي.. ليه تتبيلته الخاصة غالبًا بيحط عليه توابل اللحمة مع زيادة فى جوزة الطيب وبيسبهم وقت كافي.
البسطرمة، قديمة ومعتقة و طازة ومفهاش ثوم كتير تحسها من عند الخواجة خريستو إللي فى أغلب أفلام زمان؛ عليها كمية جبنة تركي إللي هيا "جبنة رومي" تخليك فى كل قطمة عايز مساعدة عشان اللقمة تتقطع.
الحلو بيقرمش
حلو القلاع يعني الرقة، ده مش وصف ده شكله هو زى الورقة الرقيقة مقرمشة جداا وغرقانة فى السمنة والسكر..مش محتاج تقطم منه إنت بعد ما تقطع الفطيرة أربع ترباع لف ربعك الصغير لفة وكله مرة واحدة.
ملحوظة:
الفطير مش محتاج جنبه حاجة ولا شيبسى ولا مخلخل ولا أي مقبلات؛ ممكن تكتفي بعد ما تخلص بسفن، بس نصيحة متشربش غير مايه عشان مش هتغير طعم بقك.
