في ثانوية عامة وبتكره المذاكرة.. الحل هنا

ثانوية عامة بعبع الكل بيخاف منه، وقبل ما تبدأ الامتحانات إللي هيا المعمعة الكبيرة خصوصا للناس اللي بتكره المذاكرة ومش بتطيق تقعد قدام كتاب أكتر من ساعة.. للناس دول.. أبشروا.. أنتوا مش لوحدكوا.

مبدئيا أنا كنت بكره المذاكرة جدا، مجرد ما أمسك كتاب وأقول هذاكر كنت بحس أني اتخنقت ومش طايقة أبص في الكتاب.. ومع ذلك طلعت الأولى على المدرسة في سنتين الثانوية –آه أنا من جيل الثانوية العامة على سنتين- إزاي بقى؟ هقولك..

الدروس

أولا أنا كنت باخد دروس طبعا زي معظم الناس.. في آخر شهرين كان بيبقى المدرسين خلاص قفلوا المنهج وفي مرحلة المراجعة.. سيبك بقى من كل المذاكرة اللي كانت من أول السنة لأنها أكيد اتبخرت.. أهم حاجة حاليا تكون في الدرس مركز جدا جدا.. خلي تركيزك مع المدرس وهو بيتكلم.. ركز على اللي بيكتبه عشان هيثبت في دماغك.. وأول ما تروح ابتدي راجع على اللي هو كان بيقوله..

طبعا ده بيستدعي أنك في الأساس تكون مظبط مواعيد دروسك أنهم ميكونوش ورا بعض في كام يوم.. قدامك أسبوع قسم عليه مواعيد مجموعاتك في الدروس بشكل يديك مساحة تذاكر المادة قبل وبعد الدرس بتاعها.

حاجة تانية وهي غلطة بيقع فيها ناس كتير.. إنك تاخد درسين في نفس المادة عند مدرسين مختلفين.. ده بيشتتك، ويخليك مش عارف تذاكر إيه وتركز على إيه لأن كل مدرس بيكون ليه أسلوبه وطريقته.. يا إما تكمل مع المدرس اللي معاك طالما مرتاح معاه.. يا إما تشوف مين أفضل مدرس في المراجعة وتركز معاه هو بس.

المذاكرة

أنا كنت من عشاق المذاكرة بليل.. بحب أذاكر من بعد العشا كدة لحد 9 الصبح بالكتير.. لأن الامتحانات بتيجي في شهر 6.. شهر 6 ده إحنا بننصهر فيه من الحر ودرجة الحرارة بتبقى 40، فالمذاكرة وقت الضهر ولحد المغرب كدة بتبقى صعبة جدا على ناس كتير.. الحر والصهد بيخلوك تتعب غصب عنك ومتركزش.. لو أنت بتذاكر بليل فالجو بيكون اتعدل..

أما بقى لو أنت بتنام بدري وظابط مواعيدك –ودي حاجة كويسة جدا- فحاول تختار أكتر أوضة بعيدة عن الشمس وتكون التهوية فيها كويسة.. ولو في مروحة أو تكييف شغلهم.. وخلي دايما في عصاير في البيت.. الصيف أحلى ما فيه الفاكهة.. فراولة وبطيخ وعنب.. حاول تكون الفاكهة دي دايما موجودة.. بتبقى منعشة جدا في وسط الحر ده خصوصا لو ساقعة.. وبتخليك ترجع للمذاكرة مرتاح ومركز..

الراديو

في ناس –وأنا منهم- مبعرفش أذاكر أبدا والجو حوليا ساكت وهادي.. بحس أن كل الناس نايمة ومرتاحة وأنا الوحيدة المتكدرة وقاعدة أذاكر وأحفظ.. النتاج الطبيعي إني كنت بشغل الراديو جنبي.. الموضوع ده فادني جدا.. لأن الكلام اللي كنت بذاكره كان بيتربط عندي تلقائيا بالمقطع اللي كان شغال في الراديو لحظة ما كنت بذاكره.. في الامتحان لما كنت أقابل الجزئية دي لو نسيتها بفتكر الأغنية وألاقي نفسي افتكرت اللي كنت نسياه..

طبعا مش شرط تسمع أغاني، ممكن قرآن أو فيلم أو مسرحية.. اللي ترتاحله بشرط أنه ميشتتش تركيزك عن اللي بتذاكره.. أما بقى لو أنت بتعز الهدوء ومتقدرش تذاكر وفي صوت جنبك؛ فخلاص كمل زي ما أنت.

البريك

مهم جدا تدي نفسك بريك وسط المذاكرة.. أنت كدة كدة بتكرهها، فمش ناقصة تذنيبة وتقعد متكدر كذا ساعة ورا بعض تذاكر متواصل.. هتفصل ومعدل تركيزك هيقل، وهيبقى تعب على الفاضي.. قبل ما تفصل بالظبط وقف المذاكرة، واخرج اعمل أي حاجة.. اقرأ جزء من رواية، اتفرج على التلفزيون شوية.. كلم حد من أصحابك.. ألعب مع أخوك الصغير.. انزل اتمشى شوية في الشارع هات الطلبات وارجع..

أهم حاجة أنك تخرج تماما من مود المذاكرة شوية قبل ما ترجعله.. بس زي ما هتستمع بالبريك، لازم لما ترجع للمذاكرة تكون مركز فيها وتديها حقها.

قسم يومك

ودي حاجة غير البريك، مش عشان في ثانوية عامة يبقى لازم تقضي يومك كله قاعد وحواليك الكتب من كل ناحية، الثانوية العامة مش نهاية الدنيا، دي مرحلة زي أي مرحلة تانية، هتعديها لمرحلة تانية في طريقك، لازم تحط في اعتبارك أنها مش بعبع، دي امتحانات ولازم تركز فيها بس متأفورش. قسم يومك ما بين القراءة والمذاكرة والخروج وخصص وقت لأهلك وأصحابك ولنفسك. حاول متسمعش للناس اللي بتهول طول الوقت من الثانوية العامة، وسيبك من بوستات الفيس بوك المحبطة واللي بتخوف من الامتحان، لو من دلوقتي بدأت تركز بهدوء الامتحانات هتعدي بهدوء جدا.

بطل قلق

دي أهم حاجة بقى.. أنت لو داخل الامتحان خايف وقلقان هتحس أنك ناسي المنهج، ودي حصلت قدامي لناس كتير جدا، يبقى شاطر جدا ويدخل الامتحان من خوفه ينسى مع أنه مذاكر كويس جدا.. اهدى وارتاح، لأن الهدوء ده اللي هيساعدك تركز وتذاكر وتفتكر اللي أنت ناسيه.