6 خطوات للتغلب على انعدام الثقة في العمل
معظمنا بيتمنى إنه يزود ثقته بنفسه، طب إزاي؟ فيه ناس تقولك طالما النية موجودة مش مهم وهنعرف نحقق أي حاجة.. الكلام ده غلط.
من الضروري قبل ما تمشي أي خطوة تعرف أنت عاوزها ليه، وإيه اللي المفروض تعمله علشان تحقق هدفك، خصوصًا لو كانت الثقة دي في شغلك ومع زمايلك اللي بيتنافس كل واحد فيهم علشان يقلل ثقتك في نفسك بشكل غير مباشر.
وعلشان نساعدك، «شبابيك» بيقدملك 6 نصائح هتساعدك في زيادة ثقتك بنفسك في الشغل.
اشتغل في اللي يناسبك
طول ما أنت بتختار وظيفتك بناءً على المرتب عمرك ما هتحقق نجاح، لإن ببساطة هيجي عليك اللحظة اللي تحس فيها إنك كاره الشغل ومش لاقي نفسك فيه.
ولو وصلت للكره دائمًا هتلاقي انتقادات مش هتعرف تتخلص منها لإن الموضوع مش هيقف عند الانتقاد بس لا ده هيوصل لهز ثقتك في نفسك.
طور مهاراتك
لو فاكر إن النجاح هي الوظيفة اللي وصلتلها تبقى غلطان؛ لإن الوظيفة دي بداية لتحدي أكبر هتواجه طول ما أنت شغال.
وعلشان كده لو معرفتش إزاي تطور مهاراتك وتشتغل عليها كويس، هتلاقي كل اللي حواليك بيكبر وأنت زي ما أنت، وبدل ما تسمع كلمات تشجيع تزود ثقتك بنفسك هتسمع كل اللي يرجعك ألف خطوة.
بلاش مقارنة
كتير مننا بيكونوا فاكرين إن مقارنة نفسهم بغيرهم هيشجعهم على تطوير قدراتهم ومهاراتهم، بس ده مش دائمًا صح لإن أحيانًا بتكون الطريقة دي سلبية وبتوصلك في النهاية لإحباط مش هتعرف تخرج منه.
وده على عكس المقارنة الإيجابية اللي فيها بتتحدى نفسك علشان تطور مهاراتك؛ لإن ببساطة أنت الخسران الوحيد لو ثقتك في نفسك قلت.
استفيد من اللي حواليك
طالما عاوز تزود ثقتك في نفسك، فالخطوة دي من أهم الخطوات اللي هتساعدك؛ لإن الناس اللي بتعرف تستفيد من كل حاجة حواليها حتى لو موقف، بتعرف تزود ثقتها في نفسها بعد كده.
لو عودت نفسك إنك تستفيد من صاحبك اللي بيكتب كويس في تحسين اللغة عندك مثلًا أو اللي بيعرف يتكلم كويس قدام الناس، هتلاقي ثقتك في نفسك بتزيد مع كل حاجة بتتعلمها جديد.
تدوين الملاحظات
مهم جدًا إنك تعود نفسك على تدوين أي ملاحظة تتقالك؛ لإن الخطوة دي مش بس هتساعدك في عدم تكرار الغلط لا دي كمان هتخليك تشتغل كويس على مهاراتك علشان تعرف تطورها صح.
صحيح إن أحيانًا الملاحظات دي بتكون مش منطقية بس تدوينها هيفدك بردو في إنك تدافع عن وجهة نظرك وتعزز رأيك قدام مديريك.
اعمل إنجاز
الملاحظة مش بتتقال علشان تدونها بس، مهم جدًا إنك تعرف تستغلها صح في إنجاز يحسن من شكلك قدام مديرك.
الإنجاز ده مش بس هيحسن صورتك، لا ده كمان هيزود من ثقتك في نفسك وهيخليك عاوز دائمًا تحقق إنجازات تانية.
