رئيس التحرير: أحمد متولي

للطلاب.. 5 نصائح عشان متتهزش وقت الامتحانات

للطلاب.. 5 نصائح عشان متتهزش وقت الامتحانات

صحيح إن في ناس مننا بتعرف تتحكم في نفسها أيام الامتحانات بس في غيرهم بيعيشوا مع إحساس فقدان الثقة بالنفس، وده أسوأ لحظات حياتهم.

وعلشان الثقة أثناء المذاكرة من أهم الأمور اللي لازم تركز عليها خلال الفترة دي «شبابيك» بيقدملك 5 نصائح لو التزمت بيها ثقتك في نفسك هتزيد أثناء المذاكرة.

افهم متحفظش

لازم تعرف كويس إن الحفظ اللي أنت بتعمله وأنت بتذاكر ممكن يوصلك لطريق تنسى فيه كل حاجة وأنت قدام ورقة الامتحان؛ لإن اللي بيحفظ من غير فهم زي اللي بيدخل معلومة من ناحية وبيخرجها من الناحية التانية في نفس الوقت.

بس لو أنت فاهم اللي أنت بتذاكره هتعرف تعبر عنه بأي شكل، وفي الوقت ده ثقتك هتزيد في نفسك لإنك هتحس إن تعبك ما راحش على الأرض بالعكس ثقتك هتبقى أعلى من اللي حافظ اللي بيتقاله بالظبط لإنه لو راح منه الكلام مش هيعرف يعبر عنه زيك.

بلاش تسأل أصحابك عن اللي ذاكروه

طول ما أنت بتسأل أصحابك عن اللي ذاكروه، هتكتشف كل شوية إنك ناسي نقطة معينة في المنهج وممكن تحس إن ذاكرتك مبقتش زي الأول وده أكيد هيأثر على ثقتك بنفسك.

علشان كده حط لنفسك جدول تمشي عليه في المذاكرة، طبقه بكل حذافيره، ابذل مجهود علشان تبطل تسأل غيرك عمل أيه فتحس إنك بترجع لورا مش بتتقدم خطوة، واعرف كويس إن مذاكرتهم حتى لو أكتر منك مش مقياس لنجاحهم، المهم إنك متقصرش في مذاكرتك أنت.

صاحب الورقة والقلم

مفيش أحسن من صداقة الورقة والقلم أثناء مذاكرتك؛ لإن النقطة دي هتخليك تحس إن إيدك بتكتب لوحدها في الامتحان حتى لو مكنتش فاكر كويس.

الصداقة دي مبتخلصش بعد المذاكرة وبتدوم معاك في أي وقت بعد ما تخلص، هتخليك تحس إنك فاكر كل حاجة أحسن ما تقعد تكلم نفسك كتير عن الحاجة اللي ذاكرتها وبتنساها بعد ما تقوم لمجرد إنك اندمجت مع حد بيتكلم.

عينك على هدفك

ممكن اللي حواليك يكونوا شايفين قدراتك متنفعش مع التخصص اللي اختارته سواء كان علمي أو أدبي بس أنت بينك وبين نفسك عارف إنك هتشتغل كويس وهتقدر توصل لو تعبت شوية، في الوقت ده ثقتك لازم تبقى قوية علشان لو اتهزت شوية مش هتعرف توصل للي إنت عاوزه.

أو لو دائمًا لاقي إن اللي حواليك بيحبطوك مهما ذاكرت، لو استسلمت هتلاقي ثقتك في الأرض بس لو دعمت نفسك هتعرف توصل وثقتك كمان هتزيد.

متشغلش بالك بكلام اللي حواليك

مش معنى إن في حد بيقولك إن المدرس ده أفضل من غيره وإن اللي أنت معاه هيدمر مستقبلك، إنك تسيب مدرستك خصوصًا لو في وقت قريب من فترة الامتحانات.

الفترة دي صعبة جدًا لإنك لو سبته وروحت لغيره ومفهمتش منه حاجة ده هيأثر على ثقتك بنفسك وهتحس إن العيب منك أنت؛ لإن قريبك أو زميلك استفاد منه وأنت لا.

خلي كلامك من دماغك لإن طول ما أنت بتسمع لغيرك عمرك ما هتبني ثقة قوية ومش هتعرف تقرر لوحدك، أو تبقى الاستشارة لأشخاص فاهمينك كويس.

سوزان حسني

سوزان حسني

صحفية مهتمة بالكتابة في مجال العلاقات

ميكس ميديا