5 أفكار هدايا مختلفة لعيد ست الحبايب

عيد الأم خلاص قرب وكل واحد من دلوقت بيفكر هيجيب أيه لست الحبابيب عشان يعبر بيه عن حبه ليها، وعشان كدة قولنا نفكر معاك بصوت عالي ونقولك على أفكار هدايا مختلفة لعيد أم مختلف :) والأفكار دي هتكون ما بين هدايا معنوية وهدايا مادية.

فيديو

جمع اخواتك في أي مكان وخلي كل واحد يقول كلمة ليها، ولو كنت وحيد جمع أقرب الناس لقلب مامتك وخليهم برضه يقولوا كلمة ليها في عيدها وبعدين حط الفيديو على «سي دي» وفي يومها قولها تغمض عينيها عشان تكون استعديت أنك تشغل الفيديو وبعدين قولها يلا فتحي وشوف فرحتها بقى هتكون عاملة إزاي  :)

اقرأ أيضا ⇐ هدايا عيد الأم أونلاين.. خصومات تصل لـ66%

ماكيت كارتون

اعمل ليها ماكيت كارتون كبير بصورة بتحبها ليها، واعمل ماكيتات صغيرة ليك ولإخواتك حواليها، وخلي الماكيتات بتاعتكوا بتعبر عن إن كفاحها وصلكوا لشغل مهم مثلًا لو أنت دكتور يبقى الماكيت بتاعك تكون لابس فيه سماعة وبالطو، ولو أنتي ممثلة يبقى الماكيت بتاعك على شكل دور بتحبه ليكي وهكذا.

كتاب مواقف

اكتب وخلي كل واحد من اخواتك يكتب موقف عمره ما ينساه ليها سواء موقف كوميدي أو إنساني اتعلم منه حكمة كبيرة ولو أنت وحيد اكتب مواقفك معاها برضه. وجمع بقى كل المواقف ديه في كتاب صغير والكتاب ده هتطبعوا مخصوص ليها وهيكون الغلاف بتاعه صورتها وعنوان تتفقوا عليه تسموا بيه الكتاب مثلًا «مواقف وطرائف نوجا» حاجة زي كدة فيها اسم دلعكوا لمامتكوا.

حجز عمرة

جمع فلوس من اخواتك واحجزوا ليها عمرة وفي يومها اعملوا فكرة بوكسات الهدايا الكتيرة اللي كل لما تفتح بوكس تلاقي بوكس جواه وهكذا لغاية ما تيجي لحظة البوكس الأخير اللي هيكون فيه تذكرة العمرة.

رحلة

أكيد كان نفسها في يوم تسافر لمكان معين، أهو المكان ده بقى هو اللي في يوم عيد الأم هتاخدوها ليه وتكونوا مرتبين قبلها انكوا تاخدوا أجازة من الشغل ومتقولوهاش خالص انتوا رايحين فين ولو سألت قولوا ليها مفاجأة.

اخترنا لك