النصايح دي ليك.. لو في بداية طريق الشعر
الشعر موهبة عظيمة، وبما إن ربنا حباك بيها فلازم تحافظ عليها وحفاظك ده هيجي من أنك وأنت في بداية طريقك تكون عارف إزاي يكون شعرك مميز، وعشان كدة حبينا في الموضوع ده من «شبابيك» نقدملك نصايح مختلفة من شعراء شباب ليهم بصمتهم المميزة في الشعر.
محمد إنسان
عنها سألت الله، وإنسانيات، وعن فيلسوفة، وإسكندرية يوم واحد، كلها دواوين شعرية تميز فيها «إنسان» وقدر إنه يأثر في شباب كتير بأسلوبه المتميز، وحب الناس ليه خلاه يحصل على المركز الأول في الشعر بإختيار الجمهور من اللجنة الثقافية لكلية التجارة جامعة عين شمس سنة 2012.
ونصيحة «إنسان» ليك إنك تبعد عن دور النشر اللي بتشتغل لغرض تجاري وبتستغلك عشان تكسب من وراك فلوس، وأنك تقرأ كتير جدًا لأن القراءة هتفيدك في كتابتك للشعر، وتحضر أمسيات ثقافية كتير عشان تختلط أكتر بالوسط الثقافي وتشوف إلقاء الناس للشعر عامل إزاي لأن ده هيديك خبرة مختلفة.
أحمد النجار
من الشعراء اللي وأنت بتقرأ ليهم تحس إنك بتقرأ شعر فيه روح مصرنا الأصيلة. ولـ«النجار» دواوين متميزة زي تراتيل، وكاموفلاج، وتميزه ده خلاه يفوز بجائزة الشاعر الراحل أحمد فؤاد نجم عن ديوانه كاموفلاج.
وبينصحك «النجار» أنك تكون نفسك بمعنى أنك متقلدش حد في شعره، ويكون ليك بصمتك المميزة المختلفة عن شعر الآخرين. «النجار» بيقولك لو عايز تتعلم شعر اتعلم لكن متقلدش حد، وأنك تقرأ كتير مش تقرأ شعر بس لأن قرايتك للشعر بس ممكن تخليك تتأثر باللي بتقرأه وأنت بتكتب شعرك، فأقرأ كتب مختلفة عشان تقدر تحول كل المواقف اللي بتقرأها لشعر جديد بأسلوبك.
ياسر أبو جامع
أبو جامع شاعر بيلمس في أشعاره الطابع الإنساني اللي بيلعب على وتر روحنا وبيخلينا مشدودين إننا نسمع منه شعر أكتر وأكتر، وقدر بجمال شعره إنه يفوز بالدرع الفضي عن قصيدة «الدهبية» من ديوانه «كوم الخراب»، وكمان يفوز بالمركز الأول من مركز طلعت حرب في شعر العامية 2015.
القراءة ثم القراءة هى نصيحة ياسر أبو جامع ليك لأن من خلالها هتتعرف على نفسك أكتر وتكتشف امكانياتك وتوصل للتفرد اللي بتتمناه، وشعرك خليه بيعبر عن موطنك بمفرداته وحكاياته لأن ده هيخلي شعرك صادق طالع من القلب وهيوصل لناس كتير.
